Kryeministri i Kosovës Albin Kurti, ka thënë se Kosova do të aplikojë sivjet për anëtarësim në Bashkimin Evropian.
Kurti në një intervistë për televizionin zviceran Blick tha se shpreson që këtë vit pesë shtetet e BE-së, të cilat ende nuk e kanë njohur Kosovën, do të bëjnë hapin e madh drejt njohjes.
“Ne do të aplikojmë këtë vit për t’u bërë anëtare të Bashkimit Europian. Do të ishte shumë mirë që Kosova të pranohet në Këshillin e Evropës dhe në programin e partneritetit për paqe të NATO-s. Ne jemi në kontakt me shtetet që nuk na kanë njohur . Katër nga ato janë edheanëtare të NATO-s : Spanja, Sllovakia, Greqia dhe Rumania. E edhe Qipro që është pjesë e Bashkimit Evropian, por jo edhe e NATO-s. Shpresoj që këtë vit këto vende të bëjnë hapin e madh drejt njohjes së pavarësisë së Kosovës dhe t’i bashkohet shumicës së vendeve që e kanë njohur pavarësinë e Kosovës, që janë pjesë e BE-së dhe NATO-s”, tha Kurti.
Kryeministri theksoi se Kosova ka marrë pjesë vitin e kaluar në manovrat ushtarake “Defender 2021” me shtetet anëtare të NATO-s, përderisa Serbia ishte me Rusinë në manovrat “Slavic Shield”.
“Kosova ka marrë pjesë në “Defender 2021” nga marsi deri në qershor me 330 ushtarë dhe ishim në mesin e vendeve nikoqire. Përderisa Serbia ka marrë pjesë së bashku me Rusinë në “Slavic Shield” në mesin e tetorit të vitit të kaluar”.
