Kryeministri në detyrë, Albin Kurti, ka vizituar kompaninë “Delfin LTD”, duke i thurur lavde për numrin e të punësuarëve e qarkullimin vjetor.
“Në vitin 2020 kompania e shitjeve dhe distribuimit të mallrave ushqimorë Delfin LTD, i kishte 131 të punësuar. Sot ajo i ka 264 punëtorë, rritje prej 100%. 26 milionë euro e kishin qarkullimin vjetor para pesë vitesh, e sot ajo arrin 63 milionë euro. Paga mesatare në kompani ka kapërcyer nga 460 në 737 euro.
Delfin LTD e ndan edhe pagën e 13-të, të cilën edhe ne si qeveri do ta ndajmë për sektorin publik në mandatin e ardhshëm, dhe atë qysh në fillim të vitit.
Përkrahjen do të vazhdojmë ta rrisim për kompanitë dhe bizneset edhe në katërvjeçarin e ardhshëm, për të qëndruar pranë tyre në çdo hap dhe kontribuar në zhvillimin e tyre”, thuhet në një postim të Kurtit në Facebook, krahas fotografive të publikuar nga hapësirat e kësaj kompanie.
Mirëpo, Kurti ka ‘harruar’ të përmend faktin se “Delfin LTD” nuk është shembulli më i mirë i funksionimit të bizneseve në Kosovë.
Veriu.info gjatë këtij viti ka publikuar dy skandale të “Delfin LTD” që kanë të bëjnë me peshk mishi të krimbur dhe me miell soje me substancë kancerogjene.
Në hulumtimin e publikuar nga Veriu.info në muaj maj, kemi dëshmuar me dokumente zyrtare se si kompanisë “Delfin LTD” i janë gjetur 35 mijë kg mish peshku me krimba.
Po ashtu Veriu.info në qershor ka publikuar skandalin e dytë të kompanisë “Delfin LTD”, ku me dokumente dëshmohet se si inspektoratit fitosanitar të Agjencisë së Ushqimit dhe Veterinarisë kishte bërë asgjësimi i 11,650 kg të sojës TB 200 (miell soje TB 200) me substancë kancerogjene./Veriu.info
