Veriu.info kishte raportuar ekskluzivisht para dy muajsh, se si kompanisë “DELFIN” L.T.D. Sh.P.K. me pronar Basri dhe Avni Krasniqi se AUV vitin e kaluar kishte gjetur mbi 35 mijë kilogram mish peshku të infektuar me krimba, sasi që ishte importuar nga Spanja dhe Maqedonia e veriut në Kosovë në fund të vitit 2023.
Por duket se skandali i vitit të kaluar nuk është i izoluar për kompaninë “DELFIN”, pasi që edhe këtë vit kësaj kompanie i është asgjësuar një sasi e madhe e miellit të sojës, pasi që ka rezultuar me aflatoksinë B1 mbi limitin e lejuar.
Veriu.info ka siguruar një procesverbal të inspektoratit fitosanitar të Agjencisë së Ushqimit dhe Veterinarisë të datës 04.06.2025, ku thuhet se është bërë asgjësimi i 11,650 kg të sojës TB 200 (miell soje TB 200).
“Mbështetur në kërkesën e subjektit të lartëcekur (v.j. “DELFIN” L.T.D. Sh.P.K.) … me qëllim të prezencës në procesin e asgjësimit të produktit Soja TB 200 në sasinë prej 11,650 kg, duke u mbështetur në llojin e ushqimit …. ku është konstatuar se në bazë të raportit të analizave … të datës 21.03.2025 L.U.V. së aflatoksinës mbi vlerën e lejuar, andaj i njëjti është asgjësuar”, thuhet në procesverbalin e inspektorëve të AUV.
Më tej në procesverbal bëhet e ditur se produkti është asgjësuar në deponinë e mbeturinave.
“Është asgjësuar sasia e sojës TB 200 në sasinë prej 11,650 kg në deponinë e licencuar në Mirash. Dëshmi fotot (mbulim me dhe)”, përfundon procesverbali i siguruar nga Veriu.info.
Në raportimin e testimit të produktit të siguruar nga Veriu.info shkruan: “Materiali që testohet: Sopro-TB 200 A (MIELL SOJE TB 200)”.
Përkundër që testimi i produktit është bërë më 21.03.2025, asgjësimi i këtij produkti është bërë tek në 04.06.205, që i bie rreth 2 muaj e gjysmë më vonë.
Në procesverbalin për marrjen e mostrave specifikohet më shumë lloji i produktit, ku shkruan: “Sopro-TB 200 A (MIELL SOJE TB 200, 25 kg). Po ashtu aty ceket se kjo sasi e miellit është prodhuar më 13.10.2024 me afat skadimi 13.10.2026, ndërsa vendimi i mostrimit është magazina.
Çka është mielli i sojës?
Mielli i sojës është një produkt i përpunuar që përftohet nga kokrrat e sojës të bluara dhe në disa raste të trajtuara me nxehtësi ose të degresuara (me yndyrë të hequr). Ai përdoret si përbërës ushqimor në industri dhe në amvisëri për shkak të përmbajtjes së lartë të proteinave, fibrave dhe acideve yndyrore të shëndetshme.
Rreziqet e aflatoksinës B1 mbi kufirin e lejuar:
Aflatoksina B1 kur është mbi nivelin e lejuar, paraqet rrezik serioz për shëndetin e njeriut dhe kafshëve. Ajo është substanca më toksike nga grupi i aflatoksinave, dhe konsiderohet nga Organizata Botërore e Shëndetësisë (OBSH) si substancë kancerogjene e grupit 1. (lexo: https://pmc.ncbi.nlm.nih.gov/articles/PMC3629261/)
Rreziqet kryesore:
- Kancer në mëlçi (karcinoma hepatike)
- Dëmtime kronike të mëlçisë
- Dobësim i sistemit imunitar
- Ndikim në zhvillimin e fëmijëve
Kush është kompania “DELFIN” L.T.D. Sh.P.K.?
Në faqen e kompanisë ndër të tjera shkruan se: “Delfin LTD është kompani e specializuar në shitje dhe distribuim të mallrave ushqimorë. E themeluar më 2003, tani Delfin LTD numëron plot 20 vite operim në tregun e Kosovës.” (https://delfinltd.com/sq/about-us/)
Në Agjencinë e Regjistrimit të Bizneseve të Kosovës kompania “DELFIN” L.T.D. Sh.P.K. figuron në pronësi të Basri Krasniqi dhe Avni Krasniqi.
