Kryeministri i Kosovës, Albin Kurti, mori pjesë sot në ceremoninë e diplomimit të 515 ushtarëve të rinj të Forcës së Sigurisë së Kosovës, e cila u mbajt në kazermën “Adem Jashari”.
Me këtë rast, Kurti u përcolli rekrutëve mesazhin që shërbimin ndaj atdheut ta ushtrojnë me dinjitet, përgjegjësi dhe përkushtim, duke e vlerësuar atë si një detyrë fisnike në shërbim të vendit.
Në fjalimin e tij, kryeministri theksoi se uniforma e FSK-së përfaqëson më shumë sesa një detyrë ushtarake, pasi pas saj qëndrojnë qytetarët e Kosovës, aspiratat e tyre dhe vullneti për të ndërtuar një të ardhme të sigurt e paqësore.
“Të dashur ushtarë, mos harroni kurrë se pas uniformës suaj janë qytetarët e Kosovës, familjet e tyre, fëmijët që duan të rriten në paqe dhe një popull që e ka fituar lirinë me shumë mund e vuajtje. Le të jetë emri i kryekomandantit legjendar Adem Jashari një kujtesë e përhershme se çfarë do të thotë të qëndrosh për atdheun. Ky është atdheu ynë. Ky është shteti ynë. Liria është amanet. Mbrojtja e saj është tërësi funksionesh që i ndajmë bashkë, përgjegjësi zyrtare dhe qytetare e përbashkët. Urime diplomimi. Rroftë Forca e Sigurisë së Kosovës. Rroftë Republika e populli ynë”, përfundoi kryeministri Kurti.
