Kryeministri tashmë në detyrë, Albin Kurti, bashkë me kryetaren e parlamentit po ashtu në detyrë, Albulena Haxhiun, vajtonin shumën që mund t’i kushtojë buxhetit për organizimin e zgjedhjeve parlamentare. Pra, 10 milionë euro. Megjithatë, në krahasim me paratë që kishte ndarë në formë 100 eurosh Kurti në prag zgjedhjesh, kjo shumë duket simbolike.
Kurti në paraqitjet e tij publike para se të dështojë që ta zgjidhë çështjen e presidentit, ankohej për shumën që do të harxhoheshin nga buxheti i shtetit për zgjedhjet e jashtëzakonshme parlamentare.
“Nëse shkojmë në zgjedhje të reja së paku 10 milionë euro ato kushtojnë, nëse shkojmë në zgjedhje të reja do ti humbim dhjetëra milionë euro si shtet, nëse shkojmë në zgjedhje të reja nuk do të kemi zgjidhje“, deklaronte ai.
Por, të njëjtin shqetësim nuk e kishte kur vendi ishte në prag të zgjedhjeve, atyre lokale dhe parlamentare, gjatë vitit të kaluar. Në tetor të 2025-ës, para se të mbaheshin zgjedhjet lokale, ai kishte vendosur që t’i ndante nga 100 euro për studentët.
Me fillimin e rastit akademik të vitit 2025, Kurti kishte ndarë hiç më pak se gjashtë milionë euro si masë shtesë për mbështetjen e studentëve.
Madje, sigurohej që t’iu tregonte edhe me mesazh.
“Të dashur student, Më lejoni të ju uroj vitin e ri akademik me lajmin e mirë se ju jeni kualifikuar si përfitues i shtesës së menjehershme prej 100EUR. Me qeverinë tonë, studentët gjithmonë do të kenë mbështetjen e shtetit“, thuhej në mesazhin që Kurti në emrin e tij ua dërgonte studentët.
Për zgjedhjet e përgjithshme tregohej edhe më dorëlirë. Një “masë shtesë” për t’i gëzuar fëmijët dhe të moshuarit me nga 100 euro.
Vetë Vetëvendosja njoftonte se përgjatë dhjetorit të vitit që shkoi ekzekutohej shuma e njëhershme totale në vlerë prej 70 milionë eurosh.
Përpjekja e tij që të “blejë” vota nuk kufizohej vetëm me 100 euro. Kurti kishte marrë vendim në prag të zgjedhjeve parlamentare që të rritej paga minimale në 425 euro në janar dhe 500 euro në korrik.
Kurti po ashtu bënte “blerje vote me parapagim”. Një nga zotimet e tij të para që premtonte se do të jetësoheshin ishte edhe ekzekutimi i pagës së 13-të, e cila doli në mars të këtij viti. Buxhetit ky vendim i kushtoi gjithsej 65 milionë euro.
Ai provoi t’ua “blente zemrat” edhe sektorit privat përmes shmangies së procedurave për ndryshimin dhe plotësimin e Ligjit nr. 10/L-001 mbi ndarjet buxhetore për Buxhetin e Republikës së Kosovës për vitin 2026. Përmes kësaj, synonte që të ndante rreth 200 milionë euro për sektorin privat.
Megjithatë, një nismë e tillë e u kundërshtua nga opozita në Kuvend dhe nuk kaloi.
