Zëdhënësi i PDK-së, Faton Abdullahu, ka kritikuar kryeministrin në detyrë, Albin Kurti, i cili sot u paraqit si palë e dëmtuar në gjykatë, ndërsa prej muajsh ka refuzuar t’i përgjigjet ftesës së Prokurorisë Speciale për intervistim si dëshmitar.
Ai në një prononcim për Gazeta Blic, thotë se mendësia politike e VV-së dhe Kurtit kanë ardhur nga rruga dhe refuzojnë aq lehtë policinë e gjyqësorin.
“Mendësia politike e VV-së dhe Kurti si kreator i saj, kanë ardhur nga rruga në institucione. Këtu e ka bazën refuzimi i kollajshëm si qasje delikuente në politikë ndaj policisë dhe sidomos gjyqësorit. Këtu e ka bazën qasja selektive edhe ndaj prokurorisë”, është shprehur ai.
Sipas Abdullahut, refuzimi i Kurtit ndaj prokurorisë është po aq i dëmshëm sa sulmi terrorist në Banjskë.
“Kur një Kryeministër nuk i përgjigjet ftesës së prokurorisë, pra e mohon atë, e shpall jo legjitime, kjo për demokracinë e Kosovës është e dëmshme sa për sigurinë sulmi terrorist në Banjskë. Për më keq kur në një rast tjetër Kryeministri i përgjigjet ftesës tregon edhe për qasjen kryeneçe selektive që ka ai, që është sa konfuze politikisht, aq edhe deformuese demokratikisht”, ka deklaruar Faton Abdullahu./Gazeta Blic/
