Zyra e Kryeministrit ka dhënë kontratën për shërbimet e ndriçimit të objekteve të qeverisë përmes projektorëve, që do të përdoren gjatë ngjarjeve të ndryshme zyrtare dhe ceremoniale. Ndërkohë, në OSHP është paraqitur një ankesë nga një kompani pjesëmarrëse, e cila pretendon se me këtë tender është dëmtuar buxheti publik, pasi fitues është shpallur ofertuesi me çmim më të lartë.
Ditën e sotme, (03.09.2025), Zyra e Kryeministrit ka njoftuar se ka dhënë tender për “Shërbime të ndriçimit të objekteve qeveritare me figura të ndryshme përmes projektorit”.
Sipas njoftimit në e-prokurim ,fitues është kompania “TechnoLogic” SH.P.K
Vlera përfundimtare e kontratës arrin në 38,500 euro, me një kohëzgjatje prej 24 muajsh.
Në njoftim thuhet se këto shërbime duhet bërë në raste të eventeve që organizohen nga Qeveria e Kosovës.
“Qëllimi i kontratës është që të përcaktohen kushtet që rregullojnë kryerjen e shërbimeve të ndriçimit të objekteve qeveritare përmes projektorit në rastet e eventeve të ndryshme të cilat organizohen nga Qeveria e Kosovës“, thuhet aty.
Në garë ishte edhe një kompani tjetër që ofertoi për afro 7 mijë euro më lirë.
Ankesa në OSHP ndaj Zyrës se Kryeministrit
Një nga operatorët ekonomikë pjesëmarrës ka dorëzuar ankesë, duke pretenduar se Zyra e Kurtit ka bërë shkelje të nenit 1 të Ligjit për Prokurim Publik (LPP).
Në ankesë thuhet se, Zyra e Kryeministrit ka eliminuar në mënyrë të padrejtë ofertën e tyre, e cila sipas tyre ishte më e ulët me 7,256.10 euro krahasuar me ofertën fituese.
“Rekomandimi për kontratë për një operator ekonomik i cili ka një vlerë të ofertës më të lartë dëmton buxhetin publik dhe bie ndesh me parimin e shpenzimit efikas dhe transparent të mjeteve publike”, thuhet në ankesë.
