Kryetari i Lëvizjes Vetëvendosje tash e disa javë është në kërkim të numrave për ta zgjedhur kryetarin e Kuvendit, më pas edhe qeverinë re.
Shpeshherë në situata të tilla, Kurti bën taktizime politike me qëllime politike.
Një gjë të tillë duket se e ka bërë edhe sot, ku në akademinë përkujtimore për masakrën e Studimes, ka shpërndarë një postim në rrjetin social Facebook, ku për dallim nga herët tjera ka postuar fotografi të politikanëve të partive tjera, konkretisht PDK-së dhe AAK-së, raporton Gazeta Online Veriu.info.
Kurti ka postuar fotografi të kryetarit të komunës që vjen nga PDK, Ferit Idrizi, deputetit të PDK-së, Rrahman Rama, dhe kryetarit të AAK-së, Ramush Haradinaj.
Mbetet të shihet nëse kjo është një “bërje me sy” për një koalicion me opozitën, pas parasysh faktin që Kurti ende nuk i ka numrat për zgjedhjen e kryetarit të Kuvendit dhe rrjedhimisht edhe për qeveri.
Fotografitë e postuara nga Kurti:
Postimi i plotë i Kurtit:
Në javën e parë të majit 1999, makineria ushtarake e policore e Serbisë po marshonte me projektin gjenocidal “Patkoi” të planifikuar në Beograd, nga regjimi i Millosheviqit, për shfarosjen e shqiptarëve.
Në Nabërgjan të Pejës, më 1 maj 1999, i vranë 17 civilë. E nga data 1 deri më 18 maj gjithsej janë vrarë 31 civilë, nga 13 deri në 95 vjeç.
Në mbrëmjen e 2 majit 1999, forcat kriminale serbe filluan terrorin sistematik ndaj popullatës civile shqiptare e cila po lëvizte në kolonë nga fshati Studime e Poshtme në Studime të Epërme. Brenda dy orësh, 116 shqiptarë u vranë mizorisht. Burra e gra, pleq e fëmijë, nga shumica e fshatrave të Shalës dhe rrethit të Vushtrrisë. Në mëngjes, gratë dhe fëmijët i dëbuan për në Shqipëri, ndërkaq burrat i dërguan në burgun famëkeq të Smrekonicës, ku kaluan nëpër trajtim çnjerëzor, rrahje e tortura.
Më 3 maj 1999 në oborrin e shkollës në Bukosh u pushkatuan 25 burra dhe djem shqiptarë. Forcat policore të Serbisë i ekzekutuan ata pasi i ndanë nga kolona e banorëve të dëbuar nga fshatrat e Suharekës.
Republika e Kosovës nuk mund të falë e as të harrojë. Vetëm me drejtësi për viktimat dhe dënim për kriminelët, familjarët do të gjejnë prehje dhe paqja do të bëhet e qëndrueshme.
Vuajtjet që përjetoi populli ynë nuk mund të shlyhen kurrë nga kujtesa jonë kolektive. Ndërkaq, të rënët për liri nuk do të jenë asnjëherë të harruar.
Në përvjetorin e 26-të të masakrës së Studimes, bëmë homazhe me Ministren e Drejtësisë, Albulena Haxhiu, kryetarin e Komunës së Mitrovicës Veriore, Erden Atiq, dhe deputetë të Kuvendit të Republikës.
I përkujtojmë përherë martirët e masakrës së Nabërgjanit, Studimes e Bukoshit, dhe të gjithë që u flijuan, që ne sot të jetojmë të lirë në Republikën e Kosovës.
I përjetshëm qoftë kujtimi për ta!
