Kryeministri i Kosovës, Albin Kurti, ka bashkëbiseduar me përfaqësuesit e komunitetit goran në Kosovë, nga akademia, organizatat joqeveritare, mediat dhe institucionet e Kosovës.
Siç thuhet në një komunikatë për media, duke shprehur mirënjohje për kontributin e komunitetit goran në Kosovë, Kryeministri Kurti theksoi angazhimin e Qeverisë për rritjen e mirëqenies së këtij komuniteti.
Ai veçoi mbështetjen e dhënë përmes Zyrës për Çështje të Komuniteteve në Zyrën e Kryeministrit.
Kjo ka përfshirë përfaqësimin e komunitetit në skemën e punës praktike në institucione gjatë gjashtë muajve të fundit, si dhe grantet që mbështesin OJQ-të në punën e tyre për të promovuar dhe mbrojtur të drejtat e komunitetit.
Duke vlerësuar Programin e Ballkanistikës në Universitetin e Prishtinës, të udhëhequr nga Seniha Gjylderen Krasniqi nga komuniteti goran, u theksua ndarja e 5 bursave për studentët nga komunitetet joshumicë për t’u regjistruar në këtë program, që është e vetmja mundësi e tillë në rajon për studentët që të mësojnë gjuhët zyrtare të Kosovës, së bashku me studimin e linguistikës dhe veçorive gjuhësore dhe kulturore të Ballkanit.
Ndërsa duke biseduar lidhur me zbatimin e Ligjit për Përdorimin e Gjuhëve, Kryeministri Kurti theksoi mbështetjen e dhënë për Zyrën e Komisionerit të Gjuhëve në punën e tij të rëndësishme, si dhe punën e filluar për ngritjen e Njësisë së Përkthimit dhe Harmonizimit në kuadër të Zyrës së Kryeministrit.
Tutje në komunikatë, u bisedua për forcimin e rolit të Zyrtarëve Komunalë për Komunitete dhe Kthim. Kryeministri Kurti veçoi takimin me zyrtarët dhe përgjigjen në kërkesat e artikuluara në atë takim për trajnime dhe rrjetëzim të mëtejshëm. U fol për konferencën e organizuar në qershor për të ndarë praktikat e mira dhe një tjetër konferencë që do të zhvillohet këtë javë.
Në takim u bisedua për mundësitë dhe hapat e ardhshëm për rritje të angazhimit të përbashkët drejt krijimit të vendeve të reja të punës, zhvillimit të turizmit dhe rritjes së mirëqenies së komunitetit goran në Kosovë.
