Mimoza Kusari-Lila i ka demantuar deklarimet e ministrit Hekuran Murati dhe disa deputetëve të Vetëvendosjes se i Lëvizja Vetëvendosje i ka numrat për formimin e qeverisë në seancën konstituive të Kuvendit të Kosovës, të caktuar më 15 prill.
Ish-shefja e Grupit Parlamentar të Lëvizjes Vetëvendosje tha sot se nuk ka një parashikim pozitiv për seancën e 15 prillit.
Në një intervistë për Euronews Albania, kryetarja e Alternativës shpalosi kalkulimet e partnerit të saj të madh, Vetëvendosjes, për formimin e qeverisë së re. Ajo çka zbuloi Kusari-Lila ishte pesimiste. Tha se Vetëvendosjes i mungojnë së paku dy deputetë për të arritur shumicën e thjesht, të nevojshme për formimin e ekzekutivit.
Kusari-Lila i futi në llogari edhe tre deputetët e Nismës, të cilët, siç tha ajo, kanë shprehur gatishmëri ta mbështetin formimin e Qeverisë Kurti III.
“Është e vërtetë që edhe Guxo, edhe Alternativa, të mandatuar e kanë kryeministrin Albin Kurti. Nga informatat janë që nga grupi i pakicave jo-serbe, nga dhjetë sa janë, tre prej tyre nuk kanë dhënë konfirmimin e tyre të plotë për formimin e Qeverisë. Aktualisht janë tetë përfaqësues të komunitetit jo-shumicë që e mbështesin qeverinë, përderisa ka gatishmëri edhe kryetari i Nismës, z. Limaj, për tre deputetët e vet”, tha ajo, dhe shtoi se nuk ka një marrëveshje të formalizuar me Nismën Socialdemokrate, por vetëm shprehje gatishmërie nga lideri i saj, Fatmir Limaj.
Ndryshe nga ministri në detyrë i Financave, Hekuran Murati, i cili tha sot se “patjetër” që Vetëvendosje i ka numrat e mjaftueshëm për qeverinë e re, Kusari-Lila e tha krejt të kundërtën.
Ajo tha se Vetëvendosje i ka aktualisht 59 vota, përfshirë tri të Nismës.
“56 [VV+ pakicat jo-serbe] dhe tri [të Nismës] – 59 dhe i bie që dy ende janë mangu nga 61 deputetët e shumicës së thjesht parlamentare”, zbuloi ajo llogaritë e Vetëvendosjes për formimin e qeverisë.
Megjithatë, Kusari-Lila tha se përpjekjet për arritjen e numrave vazhdojnë në pesë ditët e ardhshme.
Shpresë ka pak dhe vështirësi shumë, sipas deputetes.
“Me trendin aktual, nuk mund të kam parashikim pozitiv, por ne jemi vend i çudirave shpeshherë dhe dua të besoj.. kjo vjen nga elementi i optimizmit, dua të besoj që ne i kemi [mundësitë] edhe pse me vështirësi”, tha Kusari-Lila në fund.
Kusari-Lila e quajti “emocional” më shumë sesa “pragmatik” përgjigjen e kryetarit të LDK-së, Lumir Abdixhikut, ndaj ftesës për takim të kryetarit të Vetëvendosjes, Albin Kurti.
