Pas deklaratës së emisarit special amerikan, Gabriel Escobar, se në rast se Qeveria e Kosovës nuk do që të jetë pjesë e procesit për formimin e Asociacionit të komunave me shumicë serbe, atëherë për këtë do të diskutohet me “partnerë alternativë”, ambasada e SHBA-së konfirmoi se tashmë ka shpërndarë disa ftesa për grupe të ndryshme të shoqërisë për të diskutuar mbi Asociacionin e komunave me shumicë serbe.
Ende s’është bërë publike lista e plotë me emrat e të ftuarve, por në një përgjigje për Gazetën Express, ambasada tha se në takimin e 31 janarit do të jenë liderët e shoqërisë civile, zyrtarë qeveritarë, liderë politikë dhe diplomatë.
“Më 31 janar, ambasada amerikane do të mbajë një diskutim mbi Asociacionin e komunave me shumicë serbe në Kosovë. Ne jemi duke ftuar një grup të ndryshëm nga liderët e shoqërisë civile, zyrtarë qeveritarë, liderë politikë dhe diplomatë për të diskutuar mbi këtë çështje të rëndësishme. Qëllimi ynë është të rrisim mirëkuptimin e ndërsjellë rreth angazhimit për Asociacionin, në mbështetje të dialogut të lehtësuar nga BE-ja ndërmjet Kosovës dhe Serbisë. Ne po e organizojmë këtë diskutim në përputhje me qëllimin tonë të qëndrueshëm për të avancuar integrimin e Kosovës në strukturat europiane dhe euroatlantike dhe si reflektim i miqësisë sonë të gjatë dhe mbështetjes për popullin e Kosovës”, ka thënë ambasada amerikane.
Nuk dihet nëse do të ketë përfaqësues nga Qeveria, por sidoqoftë një anëtar i kabinetit të Kurtit do të jetë në takim. Ministri për Kthim dhe Komunitete, Nenad Rashiq, ka konfirmuar pjesëmarrjen, por duke mos treguar nëse po shkon në cilësinë e ministrit apo të kryetarit të partisë nga komuniteti serb.
Nëse po shkon në cilësinë e ministrit dhe nëse ka marrë leje nga Kurti, Gazeta Express ka dërguar pyetje në Qeveri, por s’ka marrë përgjigje. Po ashtu, edhe ministri Rashiq ka qenë i paqasshëm.
Gazeta Express mëson se në listën e mysafirëve për të folur për temën e Asociacionit janë edhe liderë nga partitë opozitare.
Ndërkaq, nga shoqëria civile deri më tani e ka konfirmuar se ka marrë ftesë Ismet Kryeziu nga Instituti Demokratik i Kosovës.
“KDI ka marrë ftesë dhe tani më ka konfirmuar pjesëmarrjen për të qenë pjesë e takimit”, ka thënë Kryeziu për Gazetën Express.
Qeveria tashmë gjendet në presion si për çështjen e themelimit të Asociacionit, si për pranimin e planit të Bashkimit Europian për të zgjidhur mosmarrëveshjen me Serbinë.
Për këto tema të nxehta dje kryeministri Kurti mori një telefonatë të rëndësishme nga SHBA.
Këshilltari Special amerikan, Derek Chollet, e ka nxitur kryeministrin Kurti që të pranojë planin e BE-së dhe të shtyjë përpara çështjen e Asociacionit.
“Fola me kryeministrin Albin Kurti për të diskutuar propozimin e BE-së për normalizimin e marrëdhënieve me Serbinë dhe për t’i kërkuar Kosovës që ta pranojë atë”, ka thënë Chollet.
