Ishte balotazhi i 14 tetorit ai që e bëri Përparim Ramën e LDK-së, fitues në komunën e Prishtinës ndaj Arben Vitisë së LVV-së, por komunikimin me ish-rivalin e tij nuk e ndali me triumfin e kryeqytetit.
Pas fitores ai tha se do ta mbante premtimin e tij se do t’ia ofronte rivalit të vet Arben Vitisë një post në komunë, madje postin e drejtorit të Shëndetësisë, meqë Vitia kishte lënë pozitën e ministrit të Shëndetësisë, për të garuar kundër Ramës.
Mirëpo edhe pse Rama e bëri lëvizjen e tij dhe ia propozoi këtë post Vitisë, si duket ish-ministri u ndje i ofenduar dhe i ironizuar nga rivali i dikurshëm.
Ai nuk i kthej asnjëherë përgjigje Përparim Ramës, e ky i fundit u detyrua ta emëroj Izet Sadikun, drejtor të ri të Shëndetësisë në komunën e Prishtinës.
Kujtojmë se Izet Sadiku është ushtrues i detyrës së drejtorit të Klinikës Infektive. Sadiku ka qenë zëvendësministër i Shëndetësisë në qeverinë Kurti I, si dhe drejtor i Qendrës së Karantinës në konviktet e studentëve për personat që ktheheshin në Kosovë gjatë periudhës që ishte shfaqur virusi.
