Policia e Kosovës, në bashkëpunim me Agjencinë e Kosovës për Inteligjencë (AKI), ka realizuar një operacion antidrogë në rajonin e Prishtinës, ku janë arrestuar gjashtë persona të dyshuar për trafikim dhe shpërndarje të kokainës. Gjatë operacionit janë sekuestruar substanca narkotike dhe asete në vlerë rreth 301 mijë euro.
Sipas njoftimit të Policisë, operacioni i koduar “Heshtja” është zhvilluar më 14 nëntor, pas një hetimi të gjatë me masa të veçanta hetimore, që ka zbuluar dyshimet për funksionimin e një grupi të organizuar me strukturë hierarkike, nga drejtuesit deri te shpërndarësit e narkotikëve në rrugë.
Gjatë operacionit janë bastisur disa lokacione, janë arrestuar gjashtë persona, ndërsa një tjetër është liruar në procedurë të rregullt.
Policia ka bërë të ditur se janë sekuestruar rreth 1.6 kilogramë kokainë, sasi të tjera të dyshuara narkotike, përfshirë marihuanë, substancë të panjohur dhe tableta të dyshuara të ekstazisë.
Po ashtu, janë sekuestruar rreth 16 mijë euro në valuta të ndryshme, gjashtë vetura, përfshirë Mercedes-Maybach, Mercedes GLE, Porsche, Audi dhe VW Tiguan, si dhe ora luksoze të markave Rolex dhe Franck Muller, stoli, telefona dhe pajisje elektronike.
Në mesin e sendeve të sekuestruara janë edhe një armë zjarri, municion, thika, peshore digjitale dhe pajisje për paketimin e narkotikëve.
Veriu.info mëson se në mesin e personave të arrestuar është edhe Jeton Stanovci, i cili dyshohet se ishte drejtues i grupit që është goditur nga operacioni i koduar “Heshtja”.
Ndryshe, personat e tjerë të arrestuar në kët aksion janë edhe: Astrit Haraqija, Albana Xhemajli-Ramadani, Alban Maloku, Gëzim Feka dhe Baftije Feka./Veriu.info
