Kylian Mbappé u pyet për kontributin e tij në fazën defensive gjatë një konference për shtyp të Real Madridit të hënën, por iu përgjigj duke vënë në dukje kontributin e tij dhe të shokut të skuadrës, Vinícius Junior, në sulm.
Francezi u pyet nëse ai dhe Vinicius duhet ta përmirësojnë punën e tyre në aspektin defensiv te Real Madrid. Mbappé u përgjigj: “Vetëm unë dhe Vinícius?”.
Gazetari iu referua më pas presingut që bëjnë Raphinha i Barcelonës dhe Ousmané Dembélé te Paris Saint-Germain.
Mbappé u përgjigj: “Nuk jam i sigurt. Natyrisht që duam të përmirësohemi dhe mendoj se dëshira për t’u përmirësuar është krejtësisht e natyrshme për të gjithë lojtarët”.
“Por mund të them se shënoj më shumë gola se ata të dy, ndërsa ata duhet të shënojnë më shumë gola për të qenë si unë. Secili është i ndryshëm”, shtoi ai.
Ai vazhdoi: “Nuk dua të bëj krahasime, sepse bëj gjëra që ata të dy nuk i bëjnë. Por kjo temë është një debat pa fund”.
Çështja e ndikimit të Mbappé te skuadra është një temë e debatueshme, edhe duke pasur parasysh shifrat e tij të jashtëzakonshme të golave.
Ai ka qenë golashënuesi më i mirë i La Ligës në secilin prej dy sezoneve të tij në Madrid, por skuadra nuk ka fituar asnjë trofe madhor gjatë kësaj periudhe.
Ndërkohë, ish-klubi i tij Paris Saint-Germain ka fituar Ligën e Kampionëve në secilin prej dy sezoneve të fundit.
27-vjeçari e ka nisur sërish sezonin në mënyrë fantastike, me katër gola në katër ndeshjet e para.
Me José Mourinho në krye, Real Madridi kërkon rezultate afatshkurtra këtë sezon, teksa synon të shmangë një sezon të tretë radhazi pa fituar një trofe madhor.
Madridi zbriti në vendin e tretë në La Liga pas humbjes 1-0 ndaj Real Betisit të premten, duke mbetur tre pikë prapa kampionit në fuqi, Barcelonës.
Ndeshja e radhës për Madridin është përballja me Interin në Ligën e Kampionëve të martën
