Berat Lahu, ish-ansambleist dhe njëri nga ata që e braktisi Lëvizjen Vetëvendosje (LVV), ka zbuluar detaje të reja lidhur me përpjekjet e kryeministrit Albin Kurti dhe vartësve të tij për emërimin e kryetarit të Bordit të Zyrës së Rregullatorit të Energjisë (ZRRE).
Lahu, i cili kishte aplikuar për këtë pozita, ka folur për përpjekjet e mundshme të brendshme për ta larguar nga gara, tha ai në RTV Dukagjin, transmeton Sinjali.
Ai në një pjesë të bisedës madje shumë drejtpërdrejt tregoi se kryeministri në detyrë, njëkohësisht kandidat për mandatin e ardhshëm qeverisës nga LVV-ja, Albin Kurti, të njëjtin e kishte thirrur në një bisedë telefonike rreth 25 minutëshe.
“Kurti më tha ku doje me shku në ZRRE pa lejen e kryeministrit?”, tha ai në emisionin Debat Plus, duke treguar kështu presionin që është bërë për ta larguar nga gara.
Në bisedën mes tyre, sipas tij, ka qenë e përfshirë edhe Artane Rizvanolli.
Megjithatë, Lahu tregoi se kishte refuzuar fillimisht të hiqte dorë, sepse sipas tij, askush në listë nuk ishte më meritor.
