Gjykata Themelore në Prishtinë, në rigjykim e ka dënuar me 1 mijë e 500 euro gjobë, Avni Mazrekun, i akuzuar për legalizim të përmbajtjes së rreme.
Mazreku akuzohej se e ka vënë në lajthim Agjencinë e Kosovës për Akreditim (AKA), duke dorëzuar konfirmimin e pagesës të printuar përmes sistemit elektronik nga llogaria në “Raiffeisen Bank” e kolegjit “ISPE”, pronar i së cilit ishte, se kinse e ka kryer pagesën e mbetur në shumë prej 19 mijë e 300 euro ndaj AKA-së, me ç’rast aplikacioni i këtij kolegji, ishte futur në shqyrtim në mbledhjen e Këshillit Shtetëror të Cilësisë.
Shpallja e aktgjykimit ndaj të njëjtit u bë të enjten, nga gjyqtari Sabit Sadikaj, raporton “Betimi për Drejtësi”.
Fillimisht, i akuzuari Mazreku u dënua me 6 muaj burgim, mirëpo me pëlqimin e tij ky dënim iu zëvendësua me 1 mijë e 500 euro gjobë.
I akuzuari obligohet po ashtu që të paguajë 150 euro në emër të super-ekspertizës dhe 50 euro në emër të paushallit gjyqësor.
Ndryshe, Mazreku më 3 prill 2019 ishte shpallur fajtor nga Gjykata Themelore në Prishtinë, e cila ndaj tij kishte shqiptuar dënim me burgim në kohëzgjatje prej tre vitesh.
Por, pas ankesës së përbashkët të mbrojtësve të të akuzuarit, Apeli e kishte anuluar aktgjykimin e shkallës së parë dhe çështjen e kishte kthyer në rigjykim dhe vendosje.
Gjykata e Apelit në arsyetimin e saj e ka obliguar shkallën e parë që të caktojë ekspertizë financiare, në mënyrë që eksperti të japë mendim profesional në lidhje me transferin bankar që kolegji “ISPE” e kishte kryer në Raiffeisen Bank”, për AKA-në.
Ndryshe, ky rast ishte gjykuar më parë nga gjykatësja Fatime Dërmaku, por pasi e njëjta ka kaluar në Departamentin për Krime të Rënda, rasti i kaloi gjykatësit Sabit Sadikaj.
Sipas aktakuzës së ngritur nga ana e Prokurorisë Themelore në Prishtinë, më 26 prill 2016, Avni Mazreku ngarkohej se ka kryer veprën penale “Legalizim i përmbajtjes së rreme”, nga neni 403 i Kodit Penal.
Mazreku akuzohej se më 30 qershor 2014, në Agjencinë e Kosovës për Akreditim në Prishtinë, e ka vënë në lajthim organin kompetent që në një dokument publik, libër apo regjistër, të vërtetojë një çështje të pavërtetë të paraparë për të shërbyer si provë në një çështje ligjore.
Mazreku thuhet se përmes sekretarit të kolegjit “ISPE”, Veton Sahiti ia kishte dorëzuar konfirmimin e pagesës të printuar përmes sistemit elektronik “E-Banking” nga llogaria e këtij kolegji në “Raiffeisen Bank”, kinse e ka të kryer pagesën e mbetur në shumë prej 19 mijë e 500 euro.
Si rezultat i kësaj pagese, siç thuhet në aktakuzë, aplikacioni i kolegjit “ISPE” ishte futur në shqyrtim në mbledhjen e Këshillit Shtetëror të Cilësisë, e cila ishte mbajtur më 1 korrik 2014.
