Andrea Lako nga UNMIK bëri një krahasim në mes Shqipërisë dhe Kosovës, duke shtuar se kjo e fundit i duket si Zvicra sa i përket sistemit të drejtësisë.
Në tryezën e diskutimit të organizuar nga Instituti i Kosovës për Drejtësi, Lako tha se nuk do të flasë për raportet e IKD-së, duke shtuar se janë bërë si garanci morale për drejtësinë në Kosovë.
Ai tha se do shpreh përshtypjet e tij për sistemin prokurorial dhe gjyqësor në Kosovë duke e krahasuar me Shqipërinë. Në Shqipëri, ai tha se është marrë me hartimin e shumë mekanizmave për bërjen e ligjit, por sipas tij, kanë dështuar, duke shtuar se kjo është bërë për shkak të ndërhyrjes së politikës.
“Në Kosovë unë i gjej njerëzit më idealistë, ndoshta për shkak të vuajtjes apo për arsye të tjera por definitivisht në Shqipëri, gjyqësori dhe prokuroria u arrit që të krijojë në koorporatë e cila nuk u përdor për ruajtjen e pavarësisë por u përdor për korrupsion”, tha Lako, raporton Betimi për Drejtësi.
Krahas kësaj, Lako tha se në Shqipëri përballen edhe me një numër të madh të lëndëve të vjetra që kanë mbetur në sirtarë.
“Tash kemi një backlog të tmerrshëm, një çështje civile duhet dhjetë vjet. Kur i shoh këto shifra, ju më dukeni Zvicër. Nuk e di nëse Zvicra është mbase kaq mirë apo jo”, u shpreh ai.
Lako tha se ka vend për përmirësime çdo herë, por bëri thirrje që në Kosovë të ruhen arritjet.
“Për këto arrtje ka meritë padyshim popoulli i Kosovës, ka profesionistë të mirë, në fakt edhe ndërkombëtarë që kanë qenë këtu gjatë kësaj periudhe, por është e rëndësishme që të ruhen këto arritje sidomos pavarësia”, tha Lako.
Instituti i Kosovës për Drejtësi (IKD), të mërkurën organizoi tryezë diskutimi, ku publikoi dy raporte të cilat trajtojnë rastet në kuadër të Departamentit për Krime të Rënda dhe të Departamentit të Përgjithshëm- Divizioni Penal.
