Aktivistja Zhaklin Lekatari ka reaguar lidhur me videot intime që ditët e fundit po qarkullojnë në rrjetet sociale, duke kritikuar mënyrën se si publiku dhe një pjesë e mediave po e trajtojnë këtë rast.
E ftuar në një lidhje të drejtpërdrejtë në emisionin “Intervista e ditës” në Dritare TV, Lekatari tha se i vjen keq për personat e përfshirë në këtë ngjarje, veçanërisht për gratë, të cilat sipas saj po përballen me gjykim dhe linçim publik.
Ajo vlerësoi se vëmendja është përqendruar te identiteti i personave dhe te detajet e jetës së tyre private, në vend që të ngrihen pyetje mbi mënyrën se si videot janë regjistruar dhe kanë përfunduar në duart e të tjerëve.
“Po bëhet një linçim edhe një gjyq publik”, u shpreh Lekatari.
Sipas aktivistes, çështja kryesore nuk është jeta intime e personave të rritur që shfaqen në këto materiale, por mënyra se si ato janë siguruar dhe shpërndarë.
“Seksi në këtë histori nuk është lajmi. Lajmi është kush i ka xhiruar videot, pse i ka ruajtur, kush i ka shpërndarë dhe kush po i shpërndan ende”, deklaroi ajo.
Lekatari ngriti gjithashtu pikëpyetje nëse pas shpërndarjes së këtyre materialeve mund të ketë pasur shantazh, kërcënim apo ndërhyrje të paligjshme në privatësinë e personave të përfshirë, duke kërkuar që vëmendja të përqendrohet te përgjegjësia për regjistrimin dhe shpërndarjen e tyre.
Ajo tha se publiku duhet të jetë më i kujdesshëm me mënyrën se si reagon ndaj rasteve të tilla dhe të mos e kthejë jetën private të personave publikë në objekt argëtimi.
“Nuk mendoj që e ardhmja e Shqipërisë varet nga dhoma e gjumit e këtyre personazheve”, deklaroi aktivistja.
Lekatari u bëri thirrje gjithashtu personave që mund të jenë prekur nga publikimi i materialeve intime që t’u drejtohen organeve të drejtësisë, ndërsa qytetarëve u kërkoi që të mos i shpërndajnë videot.
Sipas saj, çdo shpërndarje e re e materialeve e rrit dëmin ndaj personave të përfshirë.
“Po të kishim secili një kamerë të fshehur, nuk e di nëse do ishim kaq perfektë sa pretendojmë”, tha Lekatari, duke theksuar se e drejta për privatësi duhet të respektohet pavarësisht statusit publik të një personi.
