Njëri ndër udhëheqësit e grupeve në veri që kishte sulmuar gazetarët gjatë raportimit atje, Nemanja Vllaskovic është liruar me dorëzani.
Lajmin për Dukagjinin e kanë konfirmuar nga Gjykata Themelore në Mitrovicë.
“Po është e vertetë që është liruar dje, me dorëzani”, ka thënë Lumnije Surdulli nga Gjykata Themelore në Mitrovicë.
Mediat serbe kanë publikuar pamje të tij pas lirimit.
Arrestimi i Vllaskovic ishte bërë më 19 qershor. Lajmin për këtë e kishte dhënë vet Ministri i Punëve të Brendshme, Xhelal Sveçla.
“Një nga udhëheqësit e grupit që ka sulmuar gazetarët e mediumit Kallxo në Leposaviq me datë 29 maj, sapo është arrestuar. Nemanja Vllaskovic do të ballafaqohet me drejtësi për sulmet e kryera ndaj gazetarëve tanë”, kishte deklaruar ai.
Ndryshe, situatat e tensionuara kanë qenë evidente qysh nga fundi i majit të këtij viti, me zgjedhjen e kryetarëve të rinj. Zgjedhja e tyre u kundërshtua dukshëm nga banorët serbë, të cilët mbajtën protesta në vazhdimësi.
Nga këto protesta, gazetarët u sulmuan fizikisht nga ana e protestuesëve. Njëherit, të njëjtëve iu dëmtuan pajisjet dhe veturat.
