Nënkryetarja dhe drejtoresha e Arsimit e Komunës së Prishtinës Jehona Lushaku-Sadriu, ishte pjesë e garës për deputete në zgjedhjet e 9 shkurtit.
E me vota që mori, ajo arriti që ta siguronte një ulëse në Kuvendin e Kosovës.
Sipas të dhënave të deritashme të Komisionit Qendror të Zgjedhjeve (KQZ) Lushaku -Sadriu ka marrë 26 mijë e 317 vota. Vota këto të mjaftueshme, që të jetë pjesë e legjislaturës së re.
Megjithëse ka punuar me përkushtim në Komunën e Prishtinës, me marrjen e mandatit si deputete duhet t’i braktisë postet e deritashme në komunë.
“Nëse e marrë mandatin dhe konstituohet kuvendi normalisht që unë s’kam të drejtë t’i mbajë dy poste. Normalisht që shkoj në kuvend. Por deri atëherë ka kohë dhe unë i ushtroj dy pozicionet në komunë“, tha Lushaku-Sadriu për Indeksonline.
Megjithëse në postin si drejtoreshë e Arsimit në Komunën e Prishtinës, ka bërë ndryshime si mësimi gjithëditor i cili aplikohet tashmë në disa shkolla në kryeqytet, Lushaku-Sadriu thotë se puna e saj për arsimin nuk përfundon me lënien e mandatit si drejtoreshë e Arsimit në komunë.
Ajo synon që të bëhet ministre e Arsimit dhe ta vazhdojë punën në këtë sektor, duke e e aplikuar mësimin gjithëditor jo vetëm në Prishtinë, por në gjithë Kosovën.
“Synoj të bëhem ministre e Arsimit dhe këtë ta bëjë në krejt Kosovën, kështu që ky është qëllim imi”, tha Lushaku-Sadriu.
