Tani nënkryetari i Komunës së Prishtinës, Shkëmb Manaj ka dërguar mesazhe për ata që kanë publikuar bisedat në grupin e “Viberit”, teksa e ka quajtur të ulët veprimin e tyre.
Ditë më parë ishte publikuar komunikimi i Manajt në WhatsApp, në të cilin akuzonte bashkëpartiakët se ia kanë vjedhur mandatin e deputetit.
Ai ka insistuar se komunikimet i ka bërë brenda strukturave të LDK-së dhe se asnjëherë nuk ka dalë publikisht.
“Fillimisht e kam njoftuar Kryetarin e LDK-së! Pastaj, në grupin e Kryesisë kam reaguar i fundit, edhepse veç unë kam qenë në atë grup që e kam humbur mandatin e fituar nga ky proces i votave me postë. Kështu jam i edukuar unë, që ta ruaj shtëpinë time politike, edhe atëherë, kur me merret një e drejtë e fituar”, ka thënë Manaj në një postim në Facebook.
Ai ka thënë se çështjet që kanë elmente penale, duhet të dërgohen në institucionet e drejtësisë dhe të hetohen deri në fund.
“Jam sjellur kështu, sepse kam vlerësuar dhe vlerësoj që ne në LDK kemi kapacitete që defektet t’i trajtojmë dhe eliminojmë brenda për brenda organizimit tonë politik, për aq sa janë procese politike dhe strukturore. Kur ato kanë elemente penale, institucionet e drejtësisë, duhet t’i trajtojnë dhe duhet t’i hetojnë deri në pikën e fundit! Sepse LDK nuk duron individë me shkelje penale brenda saj dhe se ne duhet të jemi në funksion të plotë të institucioneve të drejtësisë”, ka thënë Manaj më tej në këtë postim.
Ai ka thënë se publikimi i komunikimit është pjesë e një fushate të disa individëve që dëshirojnë të bëjnë kauza politike duke goditur LDK-në.
“Mënyra se si ka dal komunikimi ynë i brendshëm në publik, është i ultë. Ajo është pjesë e një fushate të individëve që çështjet e tilla të debatit të brendshëm, dëshirojnë t’i bëjnë kauza politike për ta goditur shtëpinë tonë politike, në kohën kur ajo ka filluar të ringritet! Gjithashtu për ta dobësuar pozicionin e LDK-së në raport me marrëveshjet eventuale për bashkëqeverisjes dhe për të tentuar të shantazhojnë LDK-në, por kanë harruar se sot dhe asnjëherë LDK nuk mund të shantazhohet. Sot, ne duhet të jemi të përbashkuar për shumë arsye dhe për procesin e radhës zgjedhor, të zgjedhjeve lokale”, ka porositur Manaj.
Sipas tij, si rrjedhojë e të gjitha këtyre dhe “qëndrimit tim parimorë, unë këto ditë kam qenë pre e plotë goditjeve të orekstruara të brendshme dhe të jashtme. Por, unë jam këtu për të qëndruar ashtu siç e kam edhe emrin, Shkëmb! Thanë se me është mbyllur goja për pozicionin e nënkryetarit të Kryeqytetit. Ju them, se asnjë lidhje ky pozicion nuk e ka me këtë proces dhe për këtë janë në dijeni udhëheqësia e LDK-së dhe Kryetari i Kryeqytetit. Me është kërkuar nga ta që marr këtë përgjegjësi për shkak të angazhimit tim tash e mbi tri vite në Kryeqytet, me qëllim të ruajtjës së vazhdimësisë të proceseve, tash në fund të këtij mandati të parë qeverisës në Prishtinë. Ata që me njohin, e dijnë fare mirë se unë nuk bëjë pazare në politikë, prandaj asnjëherë askush nuk ka mundur dhe nuk mundet të ma mbyll gojën mua”.
“Tash jam shumë i qetë dhe jam shumë i lumtur që ata që kanë menduar dhe kanë dashur ta godasin LDK-në dhe lidershipin e saj përmes meje, kanë dështuar. Unë jam aq i pjekur politikisht, që ta kuptoj fare lehtë këtë pozicion. Prandaj, dezinformojnë. Por, unë nuk ju kam faj atyre që ju ka humbur rruga në oborr”, ka thënë Manaj.
“LDK ka nevoj për reforma përmbajtësore dhe për unitet funksional. LDK është me e madhe se secili prej nesh! Unë jam këtu, pavarësisht sfidave, sepse asnjëherë nuk kam pasur dhe nuk kam shtëpi tjetër politike përveç Lidhjes Demokratike të Kosovës”.
