Kryetari i komunës së Mitrovicës, Bedri Hamza, ka bërë homazhe në Studime të Vushtrrisë me rastin e përvjetorit të masakrës, ku u vranë dhe masakruan 116 civilë të pafajshëm shqiptarë, njofton VeriuInfo.
Ai ishte i shoqëruar nga Endrit Thaçi, i biri i presidentit, Hashim Thaçi.
Hamza është shprehur se edhe 25 vite më pas plagët e luftës nuk janë shëruar dhe se dhimbja për të vrarët e 2 majit, nga forcat serbe vazhdon të jetë e madhe.
“Sot, nesër e përgjithmonë, me respektin më të madh, do t’i kujtojmë e nderojmë të gjithë ata që dhanë jetën për lirinë e Kosovës”, tha ai.
Postimi i plotë:
Dhimbja e banorëve të Studimes së Vushtrrisë për më të dashurit e tyre të vrarë më 2 maj 1999 vazhdon të jetë e madhe. Civilë të pafajshëm u vranë çnjerëzisht nga forcat serbe vetëm pse ishin shqiptarë. U ekzekutuan edhe fëmijë e gra shtatzëna para syve të familjarëve të tyre.
Sot, 25 vjet më pas, plagët e luftës nuk janë shëruar dhe ndajmë dhimbjen me çdo familje që ka humbur anëtarë të familjes nga krimet e tmerrshme të Serbisë në Kosovë.
Sot, nesër e përgjithmonë, me respektin më të madh, do t’i kujtojmë e nderojmë të gjithë ata që dhanë jetën për lirinë e Kosovës!