Në Real Madrid ka ardhur një mbështetje e fortë për Kylian Mbappén në garën për Topin e Artë.
Mbrojtësi i Real Madridit, Raúl Asencio, i cili aktualisht është jashtë fushave pas ndërhyrjes kirurgjikale në tibie dhe ende nuk ka debutuar këtë sezon, ka deklaruar se sulmuesi francez është kandidati që e meriton më së shumti çmimin prestigjioz individual.
“Do të ishte e drejtë. E shoh duke u stërvitur çdo ditë dhe, për mua, ai është më i miri nga të gjithë kandidatët. Në aspektin futbollistik, Kylian është më i miri”, deklaroi Asencio në një intervistë për “AS”, përcjell “Gazeta Express”.
Mbrojtësi spanjoll vlerësoi veçanërisht aftësitë individuale dhe statistikat e Mbappés.
“Për sa i përket futbollit, nuk ka askënd në nivelin e tij. Ai është gjithashtu golashënuesi më i mirë dhe Topi i Artë është një çmim individual. Prandaj, do të ishte plotësisht e merituar që t’i jepej atij”, shtoi Asencio.
Mbappé është një nga favoritët kryesorë për Topin e Artë, në një garë ku bëjnë pjesë edhe Lamine Yamal, Harry Kane dhe kandidatë të tjerë të elitës së futbollit botëror.
Deklarata e Asencios vjen në një periudhë kur Mbappé është përballur me kritika dhe polemika të ndryshme, përfshirë situatën pas dëmtimit me Francën dhe rikuperimin e tij. /Gazeta Express
