Drejtoria e Inspeksionit në Komunën e Mitrovicës së Jugut më 07.07.2025 ka marrë vendim për rrënimin e mbindërtimit nga konstruksioni metalik, i ndërtuar pa leje në çatinë e rrafshët të qëndrës tregtare “Mitrovica Mall”, në rrugën “Isa Boletini”, me investitor Riad Bashota.
Në arsyetimin e Inspektoratit thuhet se më 14.06.2025 gjatë mbikëqyrjes inspektuese konstatohet se Bashota kishte filluar mbindërtimin nga konstruksioni metalik në çatinë e rrafshët të kësaj qendre tregtare pa poseduar leje/pëlqim ndërtimi të lëshuar nga organet kompetente, përkatësisht nga Drejtoria për Planifikim dhe Urbanizëm.
Sipas Drejtorisë së Inspeksionit, pala u urdhërua t’i ndërpresë punimet deri sa të pajiset me leje/pëlqim, mirëpo ai nuk i kishte ndërprerë.
Pas dy ditësh, sot më 09.07.2025, Inspektorati doli në terren për ta bërë rrënimin e këtij ndërtimi.
Të pranishëm ishin pjesëtarë të Policisë dhe investitori, Riad Bashota.
Ky i fundit kishte kundërthënie me zyrtarët e Inspeksionit dhe nuk pranonte assesi rrënimin e këtij projekti.
Mbindërtimi pa leje në “Mitrovica Mall” | 09 07 2025 | Foto: Florinda Kelmendi/ KALLXO.com
E pas gati 40 minutash u morën vesh që vetë investitori ta demolojë këtë objekt deri nesër, më 10.09.2025, në të kundërtën Komuna do ta rrënojë.
“Me kërkesën e përfaqësuesit Riad Bashota, Inspeksioni në bashkëpunim me Drejtorinë, i pranohet kërkesa për demolimin e konstruksionit metalik ta largojë vetë. Pala udhëzohet ta fillojë demolimin në orën 8:00, të nesërmen. Në të kundërtën hyn në fuqi vendimi i ekzekutimit”- thuhet në procesverbalin e datës 09.07.2025.
Drejtor i Inspeksionit, Valon Brahimi, tregoi se në këtë pjesë supozohet të ndërtohet atraksion për të rinj.
“Një mbindërtim me konstruksion metalik, pala synon që ta shfrytëzojë hapësirën në fjalë për afarizëm. Është mendu që do të jetë një lokal për të rinj, me muzikë, e ngjashme. Por kjo është irelevante për neve. Esenca është se ndërtimi e mbindërtimi pa leje sanksionohet me ligj”- tha Brahimi.
Se pse po synohet ndalimi i punimeve në çatinë e qendrës tregtare “Mitrovica Mall”, drejtori tha se mund të ketë humbje të stabilitetit të objektit.
“Mund të jetë shkak i rrezikut të përgjithshëm për shkak të humbjes së stabilitetit të objektit, po supozojmë, kjo nuk është çështje e jona. Çështja jonë është që ne e respektojmë Ligjin për ndërtim, i cili nuk lejon asnjë ndryshim në strukturë të objektit në fjalë, pa marrë leje ndërtimore”- përfundoi ai.
KALLXO.com provoi të marrë një version nga investitori, Riad Bashota, mirëpo i njëjti nuk pranoi të përgjigjej.
Si erdhi deri te vendimi për rrënimin e objektit?
Sipas vendimit të Drejtorisë së Inspeksionit, më 23.06.2025 gjatë kontrollit të radhës u konstatua se punimet kishin vazhduar pa u siguruar leja apo pëlqimi përkatës, me ç’rast u konservua me shirit.
Gjatë inspektimit, më 25.06.2025 është vërtetuar se pala ka larguar shiritin dhe prapë ka vazhduar punimet në mënyrë të paligjshme.
Pas kësaj, Inspektorati komunal i Ndërtimit më 26.06.2025 nxjerr aktvendim për rrënim.
“Pala nuk ka respektuar urdhërat e inspeksionit, ku me datë 26.06.2025 është nxjerr vendimi i ekzekutimit por pala ka aplikuar për t’u pajisur me leje apo pëlqim, Inspeksioni e ka pezulluar vendimin e ekzekutimit për t’i dhënë hapëisirë për t’u shqyrtuar kërkesa nga DPU për pajisje me pëlqim, pala nuk e ka respektuar urdhërin e inspeksionit për ndalimin e punimeve. Poashtu u konstatua me procesverbalin e datës 04.07.2025 që t’i ndërpres punimet derisa të pajisjet me një dokument nga DPU, por pala prapë ka vazhduar punimet”- thuhet në vendimin e Inspektoratit.
Vazhdimi i punimeve u konstatua më 07.07.2025 nga Inspeksioni i Ndërtimit.
Çka përmbante kontrata mes Komunës dhe qendrës tregtare?
Në vitin 2018, Komuna (e cila në atë kohë drejtohej nga Agim Bahtiri), i ka dhënë pronën në shfrytëzim me qira përfaqësuesit të kompanisë “URBAN Events& Marketing”, Riad Bashotës.
Pra bëhet fjalë për dhënien në shfrytëzim afatshkurtër, 15 vjet, të qendrës tregtare “Mitrovica Mall”.
Në kontratë, të cilën e ka siguruar KALLXO.com, mes Komunës dhe palës, të lëshuar në vitin 2018, thuhet se operatori ekonomik përveç qiramarrjes së qendrës tregtare ka për obligim të sigurojë operimin e qendrës tregtare si një qendër tregtare moderne dhe atraktive dhe nuk do të ndryshojë destinimin e objektit pa pajtim paraprak me shkrim nga autoriteti kontraktues.
Po ashtu në kontratë thuhet se operatori ekonomik do të jetë përgjegjës për mirëmbajtjen e objektit në standarde më të larta, të renovojë pjesë të objektit ose tërësinë e tij sipas nevojës. /KALLXO.com
