Një person është arrestuar në Mitrovicë të Veriut pasi është kapur duke u paraqitur me elemente të uniformës policore dhe duke poseduar mjet të ndaluar.
Siç mëson ekskluzivisht Sinjali, ngjarja ka ndodhur më 24 mars rreth orës 08:00 në lokalin “Friends” në shëtitore, ku hetuesit kanë vërejtur një person të veshur me rroba taktike, me emblemë të Policisë në njërin krah dhe flamurin ku e Kosovës në tjetrin.
Zyrtarët policorë i kanë kërkuar që t’i largojë këto shenja, pasi nuk ishte person zyrtar, mirëpo i njëjti ka refuzuar.
Pas shoqërimit në stacion policor, i dyshuari ka shfaqur rezistencë aktive dhe ka përdorur fjalor ofendues ndaj zyrtarëve.
Gjatë kontrollit, në xhepin e tij është gjetur një elektroshok në formë drite, i cili është sekuestruar.
I dyshuari, Bylent Terziqi, rreth 47-vjeçar, është intervistuar në prani të avokatit mbrojtës, ndërsa me urdhër të Prokurorit të Shtetit është ndaluar për 48 orë.
Rasti është iniciuar si “Mbajtje në pronësi, kontroll ose posedim i paautorizuar i armëve”,ndërsa hetimet janë në zhvillim.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
