Presidenti i klubit rumun FCSB, Gigi Becali, ka deklaruar se do të dërgojë 20 truproja në Kosovë për të mbrojtur skuadrën për shkak të, siç tha ai, “situatës së sigurisë”.
FCSB nesër do të përballet me Dritën në kuadër të raundit të tretë kualifikues të Ligës së Evropës. Ndeshja e kthimit do të luhet pas një jave në Prishtinë. Kampionët rumunë u eliminuan nga Shkëndija në raundin e dytë kualifikues të Ligës së Kampionëve. Më herët, vetë Becali kishte nxitur reagime me disa deklarata fyese për dy skuadrat shqiptare.
Gjatë një paraqitjeje në emisionin “Fanatik Superliga”, moderatori Horia Ivanovici i shpjegoi se emri “Drita” në gjuhën shqipe do të thotë “dritë”. Në përgjigje, Becali tha: “Vetëm një person mund të jetë dritë”, duke aluduar për Jezu Krishtin.
Megjithatë, ajo që tërhoqi më shumë vëmendje ishte deklarata e tij për masat e sigurisë. Ai njoftoi se për ndeshjen në Kosovë do të dërgojë rreth 20 truproja për të mbrojtur ekipin.
“Kështu më kanë thënë, që atje ka dhunë. Kam dëgjuar se janë bërë kërcënime. Nuk dua të them shumë, nuk dua t’i fyej ata, por kështu është më mirë”, ka thënë presidenti i FCSB-së.
Ai shtoi se nuk ka asgjë personale me ekipin nga Gjilani, por sipas tij, situata në Kosovë kërkon kujdes të shtuar për sigurinë.
