Sindikata e Pavarur e Minatorëve të Trepçës ka njoftuar se nuk iu kanë ekzekutuar pagat e minatorëve, ashtu siç ishin dakorduar pak kohë më parë.
Këtë e ka bërë të ditur përmes një postimi në rrjetin social “Facebook”, Sindikata e Pavarur e Minatorëve të Trepçës.
“Minatorët janë të tradhëtuar. Marrëveshja është thyer nga ata që e negociuan”, thuhet në reagimin e tyre për mosekzekutimin e pagës.
“Edhe pas datës 24 nuk është realizuar paga e minatorve të Trepçës së Kosovës. Marrveshja e arritur si rezultat i grevës është duke u shkelur nga bordi dhe deputetët negociator, minatorët kërkojne ti përmbahen marrveshjes”, thuhet tutje në njoftim.
Ndryshe, Ministrja e Ekonomisë, Artane Rizvanolli me shtatë nëntor ka raportuar para Komisionit për Ekonomi, Industri, Ndërmarrësi dhe Tregti lidhur me gjendjen e krijuar në ndërmarrjen “Trepça”.
Madje, Rizvanolli sa i përket grevës së urisë nga ana e minatorëve, pat thënë se kjo grevë nuk ka qenë e organizuar në përputhje me legjislacionin në fuqi në disa aspekte si “nuk ka pasur këshill grevist siç parashihet me ligj dhe se nuk ka pasur informata lidhur me organizatorët e grevës, numrin e saktë dhe gjendjen shëndetësore të tyre”.
“Greva nuk ka qenë e organizuar në përputhje me legjislacionin në fuqi në disa aspekte kyçe, duke përfshirë këtu që nuk ka pasur informata në lidhje me organizatorët e grevës, me numrin e saktë të grevistëve dhe gjendjen shëndetësore prej secilit prej tyre, kohën e hyrjes dhe daljes së grevistëve dhe personave të tjerë në minierë. Për bordin ka qenë pak situatë e vështirë pasi që nuk ka pasur një këshill grevist siç parashihet me ligj, I cili do të ishte i autorizuar për të përfaqësuar këndvështrimet dhe qëndrimet e punëtorëve”, ka theksuar Rizvanolli.
Greva e minatorëve të Trepçës e cila zgjati 10 ditë, është ndërprerë me tre nëntor pas një marrëveshje që është arritur.
Dhe se grevistët kanë dalë nga miniera në ora 02:00 e mëngjesit.
Ndryshe, minatorët e ndërmarrjes “Trepça”, kanë hyrë në grevë më datë 24 tetor, duke bërë që gjatë këtyre ditëve disa grevistë të kërkojnë edhe ndihmë shëndetësore.
Kërkesa të minatorëve ishin që pagat t’u dalin me kohë, të ketë përmirësim të kushteve të punës, sigurime shëndetësore dhe shkarkim të menaxhmentit.
