Qumështorja Vita ka reaguar sërish duke kërkuar nga Ministria e Bujqësisë dhe Agjencia e Ushqimit dhe Veterinarisë publikimin e menjëhershëm të rezultateve të analizave të mostrave të qumështit, të marra më 2 korrik.
Sipas kompanisë, më 6 korrik ishte arritur dakordim që grumbullimi i qumështit nga fermerët të rifillonte, pasi ministri Armend Muja dhe përfaqësuesit e AUV-së kishin premtuar se rezultatet e analizave do të publikoheshin jo më vonë se më 13 korrik.
Megjithatë, Vita thotë se sot, më 16 korrik, rezultatet ende nuk janë bërë publike, pavarësisht kërkesave dhe emaileve zyrtare që kompania pretendon se ia ka drejtuar Ministrisë dhe AUV-së.
“Kompania thotë se nuk e ka të qartë pse AUV ende nuk i ka përcjellë rezultatet e analizave të mostrave të marra më 2 korrik, ndërsa thekson se analizat e produkteve të importuara të marra në Doganë publikohen brenda ditës.”
Në reagim, Vita shprehet e bindur se rezultatet do të dëshmojnë se produkti i saj është “100% qumësht”, duke shtuar se publikimi i tyre do t’u japë fund dyshimeve dhe spekulimeve.
“Kërkojmë që me urgjencë të na dorëzohen dhe të publikohen rezultatet e analizave të mostrave të datës 02.07.2026, në mënyrë që edhe ata që kishin dyshime të binden se Qumështi Vita është 100% qumësht”, thuhet në deklaratën e kompanisë.
Qumështorja Vita thekson se do të vazhdojë të kërkojë transparencë dhe publikimin e plotë të rezultateve, duke shtuar se “fermerët nuk meritojnë heshtje, qytetarët nuk meritojnë paqartësi, ndërsa Kosova meriton institucione që mbajnë fjalën e dhënë”.
