Ministri i Punëve të Jashtme të Austrisë, Alexander Schallenberg, i bëri thirrje Bashkimit Evropian dhe liderëve të tij që të mos e shikojnë Ballkanin “me lupë” dhe Kievin “me syze rozë”
Në një intervistë për Financial Times, Schallenberg vlerësoi se BE-ja nuk duhet të lejojë forcimin e ndikimit të Rusisë dhe Kinës në Ballkanin Perëndimor, por duhet të dërgojë një sinjal se ato vende janë pjesë e familjes evropiane.
Kur bëhet fjalë për Serbinë, kujtohet se negociatat e anëtarësimit filluan në vitin 2014, por progresi u ndal.
“Asgjë nuk lëviz për popullin e Serbisë”, tha Shallenberg.
“Për herë të parë kemi sondazhe në Serbi ku shumica relative nuk janë më në favor të Bashkimit Evropian. Kjo duhet të ndezë të gjitha këmbanat tona të alarmit. Po i humbasim”, tha ai.
Schallenberg vlerësoi se është thelbësore ankorimi i Ukrainës dhe Bosnjë-Hercegovinës në orbitën e BE-së për të kundërshtuar ndikimin rus.
Forcimi i stabilitetit në të dy rajonet – si në Evropën Lindore ashtu edhe në atë Juglindore – është po aq i rëndësishëm. “Sizmografi ynë gjeostrategjik funksionon në të dy drejtimet”, shtoi ai.
FT kujton se liderët e BE-së do të vendosin në një samit në mes të dhjetorit nëse do të miratojnë zyrtarisht fillimin e negociatave të anëtarësimit me Ukrainën dhe Moldavinë, një hap që mund të bllokohet nga çdo kryeqytet, dhe të konsiderojnë përparimin drejt zgjerimit të bllokut në sa më shumë 35 anëtarë.
Schallenberg tha se do të ishte një “katastrofë gjeostrategjike” që Komisioni të shikonte Ballkanin Perëndimor “me një llupë dhe Ukrainën përmes syzeve rozë”.
“Nuk mund të kesh disa grupe në korsinë e shpejtë, të tjerë në korsinë e shërbimit”, tha ai.
I pyetur nëse Austria po mendon të vërë veton për fillimin e negociatave të anëtarësimit me Ukrainën nëse Bosnjës nuk i jepet drita jeshile për negociata, Schallenberg tha se bisedimet “tashmë po shkojnë në drejtimin e duhur”.
“Por. . . le të mos krijojmë një problem në rajonin që pret prej 20 vitesh dhe të mos u vendosim një pengesë tjetër. Siç tha [kryeministri shqiptar] Edi Rama, nëse e citoj saktë, a duhet të fillojmë një luftë në Ballkan për të tërhequr vëmendjen tuaj?”, shtoi ai.
Schallenberg vlerësoi se debati do të jetë “shumë i stuhishëm” duke shtuar se ai dëshiron që “sinjalet të jenë të barabarta në të dy drejtimet për arsye gjeostrategjike”, theksoi ai.
Schallenberg tha gjithashtu se BE nuk duhet të lejojë Rusinë dhe Kinën të ndërtojnë ndikimin e tyre në rajon, duke përfshirë projektet e infrastrukturës që duhet të financohen nga Brukseli.
“Duhet t’u dërgojmë një sinjal palëve të treta: këto vende janë tonat, janë pjesë e familjes sonë”, theksoi ai.
