Kreu i Listës Serbe, Goran Rakiq, njëherit ministër i Kosovës për Komunitete dhe Rikthim, ka paralajmëruar me një mosbindje totale civile në veri nëse Policia e Kosovës fillon me arrestime.
Rakiq në një konferencë për media ka thënë se ka informata se Prokuroria Speciale e Kosovës ka iniciuar procedurë ndaj mbi 70 qytetarëve serbë, përfshirë këtu qytetarë, biznesmenë e kryetarë të komunave.
“Prokuroria Speciale e Kosovës ka iniciuar procedura kundër qytetarëve tanë, biznesmenëve, kryetarëve të komunave, deputetëve, përfaqësuesve politikë, për atë siç pretendon Prishtina, sulm ndaj rendit Kushtetues të Kosovës. Arsyeja ishte protesta kundër lëvizjeve të njëanshme të Prishtinës vitin e kaluar. Do të jem i drejtpërdrejt, ky është një persekutim me motive etnike e politike ndaj popullit tonë. Sipas informatave që kemi, në pyetje është një procedurë për mbi 70 qytetarë tanë”, tha Rakiq në konferencë, raporton “Kosovo Online”.
Ai ka bërë thirrje që asnjë të mos i përgjigjet ftesës. Ndërsa u ka thënë institucioneve të Kosovës që ta përfshijnë edhe vetë atë në listën, pasi edhe vetë ka marrë pjesë në protesta.
Rakiq ka thënë se serbët e Kosovës duan ta ruajnë paqen, “por edhe qëndrimi tolerant i tyre ka kufi”.
“Nëse Prishtina fillon me lëvizje të njëanshme, Zoti na ruajt, duke arrestuar qytetarët tanë, atëherë ne do të detyrohemi të rezistojmë me të gjitha mjetet demokratike dhe jodemokratike, që përfshin mosbindje totale civile për të mbrojtur të drejtat e qytetarëve tanë”, tha Rakiq.
Ai ka thënë se Lista Serbe i ka njoftuar ambasadorët e Quintit, por edhe përfaqësuesit e BE-së dhe ka kërkuar “që ta frenojnë Prishtinë të mos shkaktojë kaos në veri të Kosovë”.
“Ne mbështesim shtetin e së drejtës, por ky nuk është shtet i së drejtës, por dhunë institucionale që persekuton popullin tonë. U bëjmë thirrje qytetarëve për unitet, kjo nuk është çështje politike, por çështje e mbijetesës në këto pjesë”, ka thënë Rakiq.
