Avazin e tenderëve të negociuar, që kritikohen si formë e rrezikshme e ekspozimit para korrupsionit, Ushtria e Kosovës nën udhëheqjen e Ejup Maqedoncit e ka vazhduar edhe me një për mirëmbajtjen e objekteve, e ka bërë krejt për ngut. “Ekstrem emergjent”. Dy firmave private, një e ndërtimeve e tjetra e kontabilitetit ia dha mbi 170 mijë euro për këtë punë
Tenderët e negociuar, një formë e kritikuar edhe nga vetë partia tash në pushtet, Vetëvendosje, janë bërë tashmë të rëndomtë nën qeverisjen e Kryeministrit në detyrë, Albin Kurti.
Ministri i dorëhequr i Mbrojtjes, që u bë edhe deputet, Ejup Maqedonci, ka kryer edhe një “pazar”, duke angazhuar për ngut, ose siç e kanë përshkruar në njoftim, ekstrem emergjent tenderin e radhës, raporton Insajderi.
Ky tender është për mirëmbajtjen e objekteve të Ushtrisë së Kosovës, dhe ai iu dha dy firmave, që në aktivitet kryesor njëra ka ndërtimin e objekteve e tjetra kontabilitetin.
Më 29 prill Ministria e Mbrojtjes njoftoi që 173 mijë euro ia dha grupit të kompanive, “E-Commerce -Kosova SH.P.K”, pronë e Meriton Bajramiit, e që person të autorizuar ka Fitim Gashin, shkruan Insajderi.
Firma del që aktivitet primar ka ndërtimin e banesave.
Në konzorcium me të është edhe kompania “Capital X Fet SH.P.K”. pronë e Egzon Bytyqit, që aktivitet kryesor ka kontabilitetin.
“AK i MM, ka për qellim qe të lidhe një kontratë me një OE, qe do të ketë kapacitet të kryej “Sherbimet për mirmbajtjen e hapsirave te objekteve të FSK-së(ekstrem emergjente)”. Furnizimet duhet të behet sipas specifikimit teknik te kërkuar të përcaktuar në dosjen e tenderit me qellim të ngritjes se operacionalitetit dhe efikasitetit ne kryerjen e detyrave sipas misionit të FSK MM-së”, thuhet në arsyetimin e dikasterit që drejtohet nga Ejup Maqedonci.
Aty bëhet me dije se edhe pse u nënshkrua kontrata me 173 mijë euro, planifikimi është që mund të shpenzohen deri në 215 mijë euro për këtë punë.
Dhe, krejt kjo vetëm për 6 muaj.
Partitë aktuale opozitare në Kosovë, fenomenin e kontratave të negociuara nga Qeveria e dytë e Albin Kurtit e kanë cilësuar në një moment edhe si ‘masakër financiare’, duke bërë me dije se kjo Qeveri deri kah fundi i vitit 2024, ka nënshkruar mbi 780 tenderë të tillë, e që vlera e parave të arkës së shtetit të shpenzuar në këtë formë arritë në mbi 200 milionë euro.
