Autoriteti Kombëtar i Ushqimit (AKU) i Shqipërisë para disa ditësu kishte konfirmuar se një ngarkesë me fileto pule të ngrirë nga Brazili, e importuar përmes Portit të Durrësit, ka rezultuar e kontaminuar me salmonelë.
Sipas analizave të kryera më 21 mars në Institutin e Sigurisë Ushqimore dhe Veterinare (ISUV), është konfirmuar prania e bakterit Salmonella Typhimurium.
Veriu.info ka pyetur Agjencisë e Ushqimit dhe Veterinës se a është ky lloj mishi duke u shitur në Kosovë dhe cilat janë masat e marra pas rastit të Shqipërisë.
Zëdhënësi i AUV, Lamir Thaçi, në një prononcim për Veriu.info ka treguar se menjëherë pas publikimit të lajmit në Shqipëri, mbi dyshimet e ngritura për prezencë të “Salmonella Typhimurium në fileto pule të importuar origjina Brazil”, Agjencia e Ushqimit dhe Veterinarisë ka lëshuar urdhëresë për kontrollin kufitarë, që të gjitha ngarkesat e mishit të pulës (fileto-breast) me origjinë nga Brazili të dërgohen për testim mikrobiologjik, duke përfshirë tipizimin për llojet Salmonella Typhimurium dhe Salmonella Enteritidis.
“Ngarkesat e mostruara sipas procedurës qëndrojnë të bllokuar deri në nxjerrje të rezultateve të analizave. Po ashtu në kontrollin e brendshëm bazuar në vlerësim të analizës se rrezikut, janë inspektuar disa pika shitëse, ku përveç kontrollit është bërë edhe marrja e mostrave. Është kontaktuar Autoriteti Kombëtar i Ushqimit në Shqipëri, nga të cilët kemi marrë konfirmim se nuk ka pasur ri-eksporte të produkteve të dyshuara nga Shqipëria për në Kosovë. Nga të gjitha linjat e komunikimit me konsumator apo institucionet shëndetësore nuk kemi pranuar ndonjë njoftim lidhur dyshime se ndonjë qytetar ka pasur indikacione shëndetësore të lidhura me situatën. Për të siguruar konsumatorët tonë ne kemi ngritur masat e kontrollit në dy nivelet. Po merren mostrat për testim, në momentin qe jepen rezultatet do të komunikohen për qytetaret
Deri me tani nuk ka asnjë argument apo rezultat laboratorik qe dëshmon për prezencë të “Salmonella Typhimurium në fileto pule të importuar origjina Brazil, gjithçka është vetëm në nivelin e dyshimeve“, ka thënë zëdhënësi Thaçi.
Ai ka potencuar faktin se AUV është duke ndërmarrë veprimet për të hequr dyshimet e ngritura.
