residentja e Kosovës, Vjosa Osmani, ka folur për prapaskenat për ceremoninë e themelimit të Bordit të Paqes, ku tha se në Davos arriti në mesnatë, pasi u kërkua prezenca e saj.
Ajo deklaroi se ftesën e kanë marrë në orët e mëngjesit, teksa zbuloi se nga presidenca i kanë thënë stafit të Shtëpisë së Bardhë nëse mund të vijë kryeministri Albin Kurti, i cili veçse ndodhej atje.
“Ftesa erdhi në 2:30 të natës, ne nuk e kemi pritur që do vijë në ato momente, nuk e kam pasur asnjë plan të udhëtojë në Davos. Mirëpo në momentin që na u dërgua ftesa, shefja ime e stafit ka qenë në komunikim me Stafin e Shtëpisë së Bardhë dhe pyetja e parë që ua ka bërë ka qenë meqenëse kryeministri është në Davos a mund të vijë ai?”, tha Osmani.
Ajo tha është kërkuar në mënyrë ekskplicite prezenca e saj si Presidente.
“Ne nuk kemi pasur njohuri se cfarë ceremonie do jetë ajo, neve na ka ardhë ftesa, mirëpo nuk e kam pasur plan të udhëtojë në Davos. Vetëm pasi është bërë e qartë që kërkohet në mënyrë eksplicite prezenca ime si presidente, vetëm atëherë kemi udhëtuar….”, shtoi Osmani.
Osmani në një intervistë për “Syri TV” ka thënë se si Presidencë, me kontaktet dhe me mbështetjen e diasporës, ka arritur ta betonojë qëndrimin e administratës Trump 2, pro sovranitetit të Kosovës, pro integritetit territorial dhe pro anëtarësimit në NATO.
“Ne kemi arritur si presidencë që me kontaktet tona dhe me mbështetjen e diasporës sonë, ta betonojmë qëndrimin e administratës Trump 2 pro sovranitetit të Kosovës, pro integritetit territorial, pro anëtarësimit të NATO-s. Kemi arritur që në takim me Marco Rubion të flasim një nga një, ta bëjmë planin konkret për njohje të Republikës së Kosovës nga vendet mosnjohëse. Kemi folur se si të arrijmë që Kosovën ta fusim në NATO, kemi folur për hapjen e kapitujve që të gjithë në tërësi. Të gjitha i kemi arritur me zero cent lobim. Asnjë koncesion, madje nuk na është kërkuar asnjë koncesion as për në dialogun me Serbinë. Është dakorduar që çdo dialog me Serbinë të jetë i bazuar në njohje reciproke”, ka thënë Osmani.
Sipas saj, kjo ka qenë mbështetje historike dhe se nuk ka pritur që ky sukses t’i pengonte ndokujt në Kosovë.
“Ky do të duhej të ishte sukses që e festojmë bashkërisht e jo sukses që dikujt i pengon. E di që i pengon Serbisë, por s’kam pritur kurrë në jetën time që t’i pengojë dikujt tjetër. Territori jonë ruhet nga ushtarët amerikanë bashkë me policinë e Kosovës. Në Bordin e Paqes, presidentë që nuk e njohin Kosovën më kanë thënë që deri më tash nuk e kemi shqyrtuar njohjen, por kjo ndryshon gjithçka”, tha Osmani.
