Ministria e Punëve të Jashtme e Republikës së Kosovës në një përgjigje për Gazetën Express kanë konfirmuar se autoritetet maqedonase i kanë caktuar masën e paraburgimit prej 30 ditësh, Blerim Ramadanit, i cili është arrestuar më 17 korrik në pikën kufitare në Jazhincë si rezultat i një fletë arresti nga Serbia, shkruan Gazeta Express.
“Ministria e Punëve të Jashtme dhe Diasporës informon opinionin se shtetasit të Republikës së Kosovës, Blerim Ramadani, i është caktuar masa 30-ditore e paraburgimit me vendim të Gjykatës Themelore në Shkup. Blerim Ramadani është ndaluar më 17 korrik 2024 në pikë kalimin kufitar Jazhincë, bazuar në një fletë arresti të lëshuar nga Gjykata e Beogradit, përmes INTERPOL Serbia, me pretendimin për krime lufte në verën e vitit 1999 në rajonin e Nerodimës”, kanë thënë për Express nga MPJ.
Nga MPJ kanë thënë se Ambasada e Kosovës në Shkup është duke punuar përmes një ekipi të ekspertëve që Blerim Ramadani të lirohet sa më shpejt dhe të kthehet në familjen e tij.
“Ambasada e Republikës së Kosovës në Shkup është angazhuar me ekip të ekspertëve juridik për lirimin sa më të shpejtë të z. Ramadani dhe kthimin e tij në familje. MPJD dhe institucionet e Kosovës do të përdorin të gjitha kanalet diplomatike për të siguruar lirimin e shtetasit tone”, kanë thënë për Express nga Ministria e Jashtme./Express/
