Analisti politik, Shenoll Muharremi ka komentuar kritikat që kanë nisur ndaj partive opozitare që sot votuan kundër pakos që sipas pushtetit ishte për të luftuar inflacionin.
Muharremi ka thënë se kjo ishte taktikë e VV-së për të blerë vota për zgjedhje.
“Sa për sqarim, kjo “pako” nuk është kundër inflacionit! E as opozita nuk e ka bllokuar, por ka kërkuar të respektohet ligjshmëria dhe procedurat sipas ligjit (dëgjojeni z. Hoti). Nuk e lufton, për shkak se për ta luftuar inflacionin nuk mundesh kurrë me një pako “hajt aty” ad-hoc, por duhen veprime strategjike të mirëbashkërenduara dhe sistematike për të pasur gjasa. Pra, shumë veprime dhe mekanizma duhet të përdoren”, ka thënë Muharremi.
“Dihet shumë mirë që kjo qeveri, e cila e propozoi këtë “pako”, ka refuzuar të luftojë inflacionin qëllimisht dhe asnjëherë nuk ka pranuar të modifikojë akcizën dhe TVSH-në për të parandaluar përhapjen e inflacionit në treg dhe në ekonomi”, ka theksuar ai.
“Pra, fjala është për një pako për të blerë vota për zgjedhje, i kemi parë këto taktika të blerjes së votave disa herë deri më tani.
Njëherë jua marrin paratë prej xhepit duke mos hequr akcizën dhe TVSH-në për naftë… e pastaj me ato para krijojnë “pako” për të jua blerë votat dhe për të manipuluar popullin më të varfër në Europë”.
