Përmes një postimi në rrjetin social Facebook, Ilir Murtezaj ka reaguar pas përfundimit të mandatit të tij si drejtor i Administratës Tatimore të Kosovës (ATK), duke thënë se gjatë udhëheqjes së tij janë dyfishuar të hyrat e ATK-së e është rritur numri i bizneseve që paguajnë tatim.
Pasardhës i Murtezajt në krye të ATK-së do të jetë Mentor Hyseni, ish kryesuesi i Bordit të Agjencisë Kosovare të Privatizimit (AKP) dhe anëtar i Lëvizjes Vetëvendosje.
Murtezaj ka shkruar se gjatë mandatit të tij, nga 456 milionë euro sa kanë qenë të hyrat e ATK-së në vitin 2018, janë rritur në mbi 952 milionë euro në vitin 2024.
Ai po ashtu ka thënë se është rritur numri i bizneseve që paguajnë tatime, nga 49 mijë në vitin 2018, në mbi 66 mijë, sipas tij, në vitin 2025.
“Ngritje e inkasimit të borgjeve tatimore, nga 94 milionë euro sa ishin në vitin 2018, në mbi 220 milionë euro në vitin 2024. Përmisim i dukshëm i integritetit të institucionit, duke shënuar rënie të përcepcionit të publikut për korrupsion nga 35.3% sa ishte në vitin 2019, në 17.1% ne vitin 2024, Raporti i UNDP, i publikuar korrik 2024” – ka shkruar ndër të tjera Murtezaj.
Ai gjithashtu ka shkruar se gjatë mandatit të tij, ATK ka zhvilluar reforma të cilat, sipas tij, janë vlerësuar nga institucione vendore dhe ndërkombëtare.
“..ku si kulm i vlersimeve pozitive është Raporti i FMN-së i publikuar në Janar 2025, ku ATK-ja në 7 nga 8 indikatorët matës është shumë më mirë se vendet ne zhvillim (përfshi vendet e Ballkanit) dhe në 5 nga 8 indikatorët matës të krahasohet me vendet e zhvilluara, përfshi vendet e BE-së” – ka thënë Murtezaj.
Administrata Tatimore e Kosovës (ATK), tani e tutje do të ketë drejtor të ri. Ministria e Financave më 13.08.2025 njoftoi se ATK-ja do të udhëhiqet nga Mentor Hyseni.
“Ministria e Financave, Punës dhe Transfereve njofton se pas përmbylljes së procedurës së rekrutimit dhe në përputhje me kërkesat dhe kriteret ligjore, është përzgjedhur dhe emëruar Drejtori i ri i Administratës Tatimore të Kosovës, z. Mentor Hyseni”– thuhet në njoftimin e kësaj ministrie.
Në njoftimin e saj, Ministria e Financave shkroi se procesi i përzgjedhjes se drejtorit të ri të Administratës Tatimore të Kosovës ka qenë transparent dhe profesional.
“Procesi është zhvilluar në mënyrë transparente dhe profesionale, duke u siguruar që kandidati i përzgjedhur të plotësojë të gjitha kushtet e nevojshme për këtë pozitë me rëndësi të lartë. MFPT ka besim të plotë që z.Hyseni se do të vazhdojë dhe avancojë punën e mirë që është bërë deri më tani, në shërbim të një administrate moderne, transparente dhe të drejtë”- thuhet në njoftim të MFPT-së.
Postimi i plotë i Murtezajt:
Të ndëruar kolegë, bashkëpunëtorë dhe qytetarë,
pas më shumë se dy dekadash shërbimi në Administratën Tatimore të Kosovës, dëshiroj të ndaj me ju se kam përfunduar rrugëtimin tim profesional brenda këtij institucioni, të cilin e fillova në vitin 2001 si Inspektor tatimor dhe e përfundova me nder dhe përgjegjësi si Drejtor i Përgjithshëm i Administratës Tatimore të Kosovës.
Ishte një udhëtim i gjatë, me shumë sfida, mësime dhe suksese të përbashkëta. Kam pasur privilegjin të jem pjesë e një institucioni kyç për zhvillimin ekonomik të vendit tonë dhe të punoj me profesionistë të përkushtuar që dhanë kontribut të jashtëzakonshëm për ndërtimin dhe forcimin e sistemit tatimor në Kosovë.
Në mandatin tim si Drejtor i Përgjithshëm kemi zhvilluar shumë reforma dhe kemi shënuar shumë rezultate, të cilat reforma dhe rezultate u vlersuan nga institucionet vendore dhe ndërkombëtare, ku si kulm i vlersimeve pozitive është Raporti i FMN-së i publikuar në Janar/2025, ku ATK-ja në 7 nga 8 indikatorët matës është shumë më mirë se vendet ne zhvillim (përfshi vendet e Ballkanit) dhe në 5 nga 8 indikatorët matës të krahasohet me vendet e zhvilluara (përfshi vendet e BE-së)!
Me poshtë po evidentoj vetem disa nga të arriturat kyçe:
* Ngritja e vlerësimit te institucionit të ATK-së, nga një institucion i krahasuar vetem me vendet e rajonit, tanimë ATK-ja konsiderohet institucion i modernizuar dhe i krahasuar me vendet e zhvilluara (vendet e BE-së),
* Ma teper se dyfishim i rritjes se te hyrës nga 456 mil euro sa ishin ne vitin 2018, në mbi 952 mil euro ne vitin 2024!
* Ngritje e inkasimit te borgjeve tatimore, nga 94 mil euro sa ishin ne vitin 2018, në mbi 220 mil euro në vitin 2024!
* Rritje e bizneseve qe paguajnë tatime, nga 49 mijë sa ishin ne vitin 2018, në mbi 66 mijë ne vitin 2025!
* Përmisim i dukshëm i integritetit te institucionit, duke shënuar rënje te percepcionit te publikut per korrupsion nga 35.3% sa ishte në vitin 2019, në 17.1% ne vitin 2024 (Raporti i UNDP, i publikuar korrik/2024). Ky permisim është si rezultat i vendosjes se mekanizmave të fortë të kontrollit, për ngritje të llogaridhënjës dhe përgjegjësis së stafit!
Në aspektin personal ndihem i përmbushur dhe shumë krenar për të gjitha këto suksese, dhe që faqebardh po perfundoj një kapitull te karrieres sime profesionale, duke hyrë i vetmuar ne dyert e ATK-së në vitin 2001, dhe duke dale me plotë miq dhe bashkëpuntor në vitin 2025!
Falënderoj të gjithë ata që më kanë mbështetur gjatë kësaj periudhe – kolegët, bashkëpunëtorët vendorë dhe ndërkombëtarë, si dhe qytetarët dhe bizneset me të cilët kemi ndarë një vizion të përbashkët për një Kosovë më të drejtë, më transparente dhe më të zhvilluar ekonomikisht.
Me përfundimin e këtij kapitulli, mbetem i hapur për angazhime të reja profesionale dhe shpresoj që përvoja dhe njohuritë e fituara gjatë këtyre viteve do të vazhdojnë të jenë në shërbim të vendit tim.
Me respekt dhe mirënjohje,
Ilir Murtezaj
