Ish-kryeministri i Kosovës, Isa Mustafa po fajëson udhëheqjen kosovare për mosnjohje të reja nga shtetet e tjera.
Ai, në një prononcim për FrontOnline, ka hedhur akuza duke filluar nga Presidenca, Qeveria e deri të Kuvendi.
Sipas tij me këtë qasje të tyre, Kosovës nuk do të mund t’i vijë asnjë njohje e re.
Por, thotë se mund të ketë vetëm ç’njohje.
“Nuk është fjala këtu se sa e qëlluar është ministresha e jashtme apo se sa e përgatitur është kjo ministri, por problemi qëndron te politikat shtetërore që po i ndjek Kosova, të Presidentes, Qeverisë, Parlamentit. Politikat e tanishme, jam i bindur se nuk i sjellin njohje Kosovës. Mund ti sjellin vetëm tërheqje të njohjeve dhe bunkerizim”, ka thënë Mustafa, në një prononcim për FrontOnline.
Por, pavarësisht kësaj, Mustafa thotë se këta nuk duhet të shpallen fajtorë.
Ai, deklaron se fajin e ka dikush tjetër.
“Këta që s’po arrijnë të sigurojnë asnjë njohje nuk duhet të shpallen fajtorë. E kemi ditur se cilat politika do ti ndjekin, ua kemi dhënë votën. Prandaj për çdo dështim, fajtore është vota e shumicës”, është shprehur ai, për FrontOnline.
E, derisa ka folur për njohjet ai ka thënë se Kosova nuk po ofron pothuajse asgjë në mënyrë që të tjerët ta njohin.
Sipas tij, vendi ka nevojë për përkrahje të jashtme.
“Prandaj shtrohet pyetja bazike se çfarë po ofrojmë ne, që të na njoh dikush?
Fuqi ekonomike, jo. Fuqi shkencore, jo. Forcë luftarake, jo. Fuqi demokratike, jo. Jemi një shtet i ri në zanafillën e konfigurimit demokratik e institucional, i cili ka shumë nevojë për përkrahje të jashtme”, ka deklaruar ndër të tjera Mustafa.
Ish-kryeministri, Mustafa ka thënë se tani për tani politika shtetërore e jashtme duket pa identitet.
“Tani politika jonë shtetërore e jashtme duket e paidentitet. Me SHBA-të marrëdhëniet nuk janë ato që do duhej të jenë. Qeveria po kundërshton zbatimin e Marrëveshjes së Washingtinit; kundërshtoi edhe gasësjellsin me financim të pjesshëm nga SHBA. Marrëdhëniet e institucioneve më të larta të Kosovës me BE-në karakterizohen më shumë me kundërshtime sesa me vullnet dhe kulturë bashkëpunimi. Po sillemi sikur bota është e varur nga ne, se të gjithëve duhet tu japim leksione. Të gjitha këto po bëhen për konsum të mjerë të brendshëm”, ka shtuar ai për FrontOnline.
Ndërsa, thotë se edhe pushteti e ka një moral, e që sipas Mustafës këtij aktualit po i mungon.
“Edhe pushteti e ka një moral, që ndërlidhet për interesa të vendit. Në këtë rast ai mungon, sepse me çfarë pushteti mund të krenohemi, nëse s’jemi mirë me askënd. Nëse çdo ditë prodhojmë kundërshtarë dhe humbim miqtë tanë”, është shprehur ndër të tjera Mustafa.
Sipas tij, që nga shpallja e pavarësisë Kosova është identifikuar si vend properëndimor dhe proamerikan.
Kosova në vitin 2021 ka pasur vetëm një njohje.
Izraeli është vendi i fundit i cili mori vendim që ta njoh shtetin i cili e shpalli pavarësinë në vitin 2008.
E, kjo njohje u mundësua nga Shtëpia e Bardhë në takimin që ka ndodhur më 4 shtator të vitit 2020 në mes kryeministrit të atëhershëm të Kosovës, Avdullah Hoti dhe presidentit serb, Aleksandër Vuçiq nën kryesimin e presidentit të atëhershëm të ShBA-së Donald Trump.
