Kryeministri Albin Kurti deri më tani nuk ka ndërmarrë ndonjë veprim lidhur me çështjen e naftës. Në media është publikuar një foto të çmimit të naftës, që shkon 1.71 euro për litër, të realizuar në pompën e derivateve ‘Ex Fis’, kompani e afërt me Lëvizjen Vetëvendosje.
“Që prej shpalljes së pavarsisë, nafta kurrë s’ka qenë më shtrejtë: 1 litër = 1 euro e 22 centë. Edhe më kaherë se kaq, nuk ka pasur këso thatësie në muajt tetor e nëntor. Shumë bujq sivjet nuk kanë mbjellë fare, kurse atyre që kanë mbjellë nuk po iu mbin fara. Shumë moti bujqësia kosovare s’ka qenë kaq dobët e importi kaq i lartë”, thuhet në deklaratën e Kurtit në ‘Facebook’ më 2018-ën.
Kurti më tej thoshte se po shtohen xhipat qeveritarë, që e kanë naftën e lirë “ashtu siç duhet ta kishin traktorët e bujqve të cilët s’po kanë llogari të punojnë tokën”.
Në anën tjetër, zotohej se me qeverisjen e LVV në të ardhmen, “lirohet nafta për traktorët e bujqve që do ta punojnë tokën dhe hiqen xhipat e shtrenjtë, sepse popullit i duhet dhënë llogari”.
Megjithatë, as nuk po ndodh lirimi i naftës për bujqit e as s’po hiqen xhipat e shtrenjtë.
Këtë deklaratë e ka shpërndarë deputetja e LDK’së, Janina Ymeri, e cila e ka cilësuar “rekord të ri” çmimin e lartë të litrit të naftës.
“Rekord i ri! Njeriu i njejtë, vetëm nga kritika në nivel të ri të çmimit”, ka deklaruar Ymeri.
Qeveria ende s’ka ndërmarrë asnjë veprim për zbutjen e rritjes së çmimit të produkteve të naftës.
