Komuna e Skenderajt përmes një komunikate i ka reaguar Qeverisë së Kosovës.
Një gjë e tillë ka ndodhur pasi komuna e Skenderajt është përjashtuar nga Këshilli Organizativ për shënimin e Epopesë së UÇK-së me 5,6 dhe 7 mars, raporton Gazeta Online Veriu.info.
Kjo shihet edhe nga një vendim i kryeministrit Kurti për themelimin e këshillit organizativ për disa ngjarje me rëndësi shtetërore ku hyn edhe Epopeja e UÇK-së.
E çudia e radhës është se në këtë këshill është ministri Hekuran Murati i cili kishte ofenduar rëndë veteranët e UÇK-së duke thënë se më lirë do ta na kushtonit mercenarët duke aluduar në pagesat për këtë kategori të luftës.
Përjashtimin nga këshilli organizativ e kundërshtuar komuna e Skenderajt e cila ka thënë se kjo po ndodh për herë të parë.
Reagimi i plotë i komunës së Skenderajt:
Sqarim për opinionin rreth organizimit të Epopesë së UÇK-së
Me keqardhje njoftojmë qytetarët dhe opinionin publik se është hera e parë që Komuna e Skenderajt përjashtohet nga Këshilli Organizativ për shënimin e Epopesë së Ushtrisë Çlirimtare të Kosovës, e cila mbahet me 5, 6 dhe 7 Mars, me aktivitete të ndryshme në Prekaz dhe në qytetin e Skenderajt, pra në territorin administrativ të komunës së Skenderajt.
Komuna e Skenderajt gjithmonë ka qenë pjesë e organizimit të Epopesë dhe me punë, angazhim e përgjegjësi të lartë ka kryer detyrat e saj për mbarëvajtjen sa më të mirë gjatë gjithë viteve të kaluara, duke treguar bashkëpunim të shkëlqyer me të gjitha qeveritë qendrore nën patronatin e të cilave organizohet ky shënim.
Epopeja e UÇK-së është ndër ngjarjet më madhështore e cila gjithmonë dhe çdoherë ka personifikuar unitetin, afrimin dhe mirëkuptimin e të gjithë shqiptarëve dhe asesi përqarjen e përjashtimin.
Përkundër kësaj, Komuna e Skenderajt do të vazhdojë që këtë ngjarje ta shënojë me aktivitete të shumta sipas agjendës zyrtare, e cila do të publikohet të premten në faqen zyrtare të Komunës, në rrjete sociale dhe në media.
