Kosova është vend i vakive dhe kjo bindje forcohet çdo ditë me ndodhitë që i shohim dhe i dëgjojmë këtu.
Klubi i futbollit Suhareka e ka shkarkuar çuditërisht trajnerin i cili po e shpinte me hapa të sigurt drejt Superligës së Kosovës.
Granit Begollit iu kumtua vendimi i befasishëm dhe i papritur për shkarkimin e tij, vetëm një ditë pas fitores së thellë të suharekasve ndaj ekipit Rilindja 1974 me rezultat 4:1, shkruan “Gazeta Express”.
Nën drejtimin e njërit prej trajnerëve më perspektivë që i ka momentalisht Kosova, FC Suhareka e sheh veten në vendin e dytë në Ligën e Parë, Grupi A, me mundësi të mëdha për ta bërë një vend në ligën elitare nga edicioni i ardhshëm.
Mirëpo, edhe pse klubi i sapoformuar që ende nuk ka marrë formë dhe që ka kryesi dhe gjithçka të re, prej zeros, ishte brenda objektivave, e mori vendimin për ta ndërprerë bashkëpunimin me trajnerin Begolli.
FC Suhareka u fuzionua dia muaj më parë me klubin nga Prizreni, FC A&N, duke bërë përforcime gjatë verës dhe duke e angazhuar trajnerin Granit Begolli, i cili vinte nga një sukses i jashtëzakonshëm që e kishte arritur me Feronikelin, të cilin, përkundër vështirësive të ndryshme gjatë rrugës, e kishte inkuadruar në Superligë në sezonin që shkoi.
Por, edhe pse bëri punë të mirë dhe profesionale në Suharekë, duke i regjistruar 5 fitore nga tetë ndeshje të zhvilluara, kjo nuk ishte e mjaftueshme për të.
Begolli kishte eksperienca pozitive edhe tek Liria dhe te Vëllaznimi, ndërsa futbollin e ka më shumë pasion se që mundohet të ketë përfitime prej tij, shkruan “Gazeta Express”.
Sidoqoftë, Begolli nuk pritet të qëndrojë gjatë pa klub dhe shumë shpejt mund ta shohim duke e marrë drejtimin e një ekipi të ri.
Trajneri i ri ka oferta dhe kishte edhe sa ishte pjesë e Suharekës, ndërsa klubet e interesuara për të e prisnin ndarjen me Suharekën për ta angazhuar atë.
