Ndërsa ndodhet në Stamboll pas një takimi me presidentin turk Recep Tayyip Erdogan, në konferencën e përbashkët, kryeministri Albin Kurti, fjalën e ka nisur duke folë për kulturë e histori.
“Që nga Mesihu i Prishtinës, poeti i Prishtinës i shekullit të 16-të, e te Sami Frashëri e Hasan Prishtina, Stambolli ishte gravitim edhe për popullin tonë,”- ka thënë Kurti.
Ndërsa ka vazhduar të flasë për Sami Frashërin, duke thënë se ai është “ndër etërit e rilindjes kombëtare për popullin shqiptar”, Kurti ka thënë se për popullin turk Samiu është “themeltar i intelektualizmit modern”.
Ndër të tjera, Kurti ka thënë se Stambolli ka nisur një pjesë të “zgjimit tonë kombëtar”, ndërsa ka folur edhe për marrëdhëniet mes dy vendeve.
“E falënderova presidentin Erdogan për përkrahjen e Turqisë për anëtarësimin e Kosovës në NATO dhe në KiE. Në NATO na bashkon orientimi e në KiE vlerat. Në të dyja na bashkon momenti kritik nëpër të cilin po kalon Evropa,”-është shprehur ai.
Kurti më tej ka shtuar se, Turqia është ndër partnerët tanë kryesor ekonomik e tregtar.
“Kjo na gëzon po nuk duhet të na mjaftojë. Le ta shfrytëzojmë aktualitetin e bashkëpunimit për ta arritur potencialitetin e madh të tij,”- ka thënë Kurti.
