Sot Policia e Kosovës ka zhvilluar një aksion në Ministrinë e Infrastrukturës me urdhër të Prokurorisë Themelore të Prishtinës më dyshimin për keqpërdorime të detyrës zyrtare.
Veriu.info mëson se në këtë aksion janë arrestuar tri zyrtare të kësaj ministrie, që janë: Florije Selimi, Edila Gosalci dhe Vjollca Vishaj.
Burime të Veriu.info bëjnë të ditur se Florije Selimi është nëna e reper Getoar Selimi.
Ndryshe, lajmin për aksionin e sotëm e ka konfirmuar edhe zëdhënësi i Policisë së Kosovës, Baki Kelani.
“Policia e Kosovës me njësitë e saja relevante, me autorizim të Prokurorisë kompetente, sot në Prishtinë është duke kryer hetime ndaj disa personave mbi dyshimet për keqpërdorim të detyrës zyrtare. Pas përfundimit dhe kompletimit të zhvillimeve policore, në bashkëpunim dhe koordinim me organet e drejtësisë mund të bëhen publike informacione shtesë”, ka thënë Kelani.
Vërejtje: Personat e përmendur në këtë artikull, sipas ligjeve të Republikës së Kosovës, konsiderohen të pafajshëm deri në vendimin e formës së prerë nga gjykata.
