Aktakuza e ngritur nga Prokuroria e Përgjithshme e Bambergut dhe Zyra Qendrore për Krimin Kibernetik të Bavarisë ndaj Mikheil B. për një dëm financiar që arrin deri në 230 milionë euro, e zhvendos përfundimisht Shqipërinë nga roli i një vendi periferik në hartën e krimit financiar ndërkombëtar dhe e vendos atë si territor operativ ku janë prodhuar, qarkulluar dhe më pas ricikluar para të zhvatura nga qytetarë europianë përmes industrisë së call-centerave mashtruese të lidhura me Milton Group.
Dosja gjermane përshkruan një strukturë të organizuar, të qëndrueshme në kohë, me ndarje rolesh ku call-centerat funksiononin si linja prodhimi të mashtrimit, me operatorë të trajnuar, skripte të standardizuara dhe objektiva financiarë të matshëm, ndërsa Shqipëria shfaqet qartë si bazë operative me zyra, staf masiv, flukse parash dhe mbrojtje faktike që u ka lejuar këtyre strukturave të funksionojnë për vite.
Në këtë arkitekturë kriminale, një nga figurat kyçe që del në mënyrë të përsëritur është Amant Josifi, i shpallur në kërkim ndërkombëtar dhe i strehuar aktualisht në Dubai, i cili rezulton të ketë kontrolluar struktura call-centerash në Tiranë dhe të ketë shërbyer si nyjë lidhëse mes operacioneve lokale dhe rrjetit ndërkombëtar të Milton Group. Hetimet dhe materialet investigative ndërkombëtare e përshkruajnë Josifin jo thjesht si administrator, por si bosi i mashtrimit me akses politik, fakt që shpjegon pse këto aktivitete kanë funksionuar hapur, me qindra punonjës dhe zyra të blinduara, pa u shqetësuar nga autorietet vendase deri në goditjet e koordinuara ndërkombëtare të viteve të fundit.
Global Fast Food Albania u krijua në vitin 2015 nga DADU shpk, kompani në pronësi të Alban Alikonit, mashtruesi i skemës së karburanteve GULF, një emër i njohur publikisht dhe i lidhur prej vitesh me një nga aferat më të rënda financiare në tregun shqiptar. Pas kësaj faze fillestare, kompania nisi një qarkullim pronësie që nuk kërkon shumë shpjegime për t’u kuptuar, fillimisht kaloi te Global Fast Food Holding Limited, më pas te Tiandzi Limited dhe në korrik 2024 përfundoi te TP Investment Limited, një kompani offshore e regjistruar në Ras Al Khaimah International Corporate Centre në Emiratet e Bashkuara Arabe, juridiksion që përdoret gjerësisht për fshehjen e pronarëve.
Këto lëvizje nuk lidhen me zgjerim, investime apo ristrukturim, por krijojnë një distancë të qëllimshme mes aktivitetit që zhvillohet çdo ditë në Shqipëri dhe njerëzve që marrin vendimet dhe kontrollojnë paratë, duke hequr nga vemendja kush fshihet realisht pas kompanisë dhe nga vjen kapitali që e mban atë në këmbë.
TP Investment Limited rezulton e regjistruar në një juridiksion që ofron privatësi të plotë, mungesë raportimi fiskal dhe fshehje të pronësisë. Pronarja zyrtare e kësaj kompanie është Lela Gelkhvidze, shtetase gjeorgjiane me adresë në Tbilisi, emër që shfaqet në dokumente si aksionere formale, por që përputhet me një model të njohur të përdorimit të administratorëve nominalë në skema të pastrimit të parave. Në të njëjtin kontekst shfaqen edhe shtetas të tjerë gjeorgjianë të lidhur me dosje të ndryshme ndërkombëtare mashtrimi.
Një figurë qendrore në këtë rrjet është Revaz Saakadze, shtetas gjeorgjian me vendbanim në Tiranë, i përshkruar në disa raporte si ideator i skemave mashtruese me forex në Europë dhe ortak i Amant Josifit në aktivitetin e call-centerave. Saakadze rezulton gjithashtu ortak me Aleksandër Josifin, babanë e Amant Josifit, në kompaninë e ndërtimit Balkan Investment Group, e dyshuar për pastrim parash. Për të kamufluar lidhjet, aksionerët shfaqen përmes kompanive CONSTRUCTION 21 dhe NEW STANDARD, një tjetër model tipik i fragmentimit të pronësisë për të shmangur përgjegjësinë direkte.
Mekanizmi i pastrimit të parave funksiononte në disa nivele njëkohësisht. Paratë e zhvatura nga viktimat europiane nuk transferoheshin si shuma të mëdha që do të ngrinin alarme bankare, por fragmentoheshin në pagesa të vogla për shërbime fiktive, kontrata marketingu, konsulence apo furnizimesh, të gjitha të justifikuara në letër si shpenzime normale të një zinxhiri fast-food. Një pjesë e kapitalit shfaqej si xhiro ditore nga shitjet, një tjetër si pagesa qirash apo investime për hapje pikash të reja, duke e humbur gradualisht identitetin kriminal të parasë.
Sipas burimeve, motorristat e delivery-t merrnin para cash në një adresë të njohur në zonën e Laprakës, adresë që përdorej si zyrë operative nga Amant Josifi, Olsi Rama dhe grupi Milton, dhe më pas ktheheshin në pikat e shërbimit ku i hidhnin këto para në arka si xhiro ditore, duke i kaluar nga dora në dorë nga cash i pastër rrugësh në të ardhura formalisht të regjistruara, në një skemë të thjeshtë dhe të përsëritur pastrimi parash.
Hapi pasues ishte nxjerrja e këtij kapitali jashtë Shqipërisë përmes strukturave offshore në Ras Al Khaimah dhe British Virgin Islands, juridiksione që lejojnë qarkullimin e miliona eurove pa transparencë dhe pa bilance të rregullta, duke thyer çdo zinxhir gjurmueshmërie financiare. Fast-food-i shërbente si fazë tranzitore, ndërsa kapitali përfundonte në sektorë të tjerë si ndërtimi dhe pasuritë e paluajtshme, ku paraja bëhej praktikisht e padallueshme nga kapitali i ligjshëm.
Nga TP Investment te KAN shpk e biznesmenit kosovar Fatmir Zymberi; një blerje pa detaje financiare
Në tetor 2025 ndodh një zhvillim që kërkon vëmendje të veçantë. KAN shpk, grup rajonal me seli në Kosovë dhe në pronësi të Fatmir Zymberit, investitorit kosovar te ‘Prishtina Mall’ shpall zyrtarisht marrjen e pronësisë së rrjetit KFC në Shqipëri, duke blerë Global Fast Food Albania nga TP Investment Limited. Në momentin e blerjes, kompania operonte 13 restorante, 11 KFC dhe 2 Pizza Hut, kishte xhiro vjetore për vitin 2024 rreth 1.44 miliardë lekë dhe fitim neto rreth 141 milionë lekë.
Megjithatë, për këtë transaksion nuk ekziston asnjë informacion publik mbi çmimin e blerjes, mënyrën e pagesës apo burimin e fondeve. Nuk ka deklarim për kredi bankare, rritje kapitali apo financim nga fitime të akumuluara. Kalimi nga një strukturë offshore në pronësi rajonale ndodh pa asnjë shpjegim financiar, pavarësisht se bëhet fjalë për një aset me qarkullim të lartë cash dhe me histori pronësie të lidhur me juridiksione offshore dhe individë të përfshirë në dosje penale ndërkombëtare.
Me të dhënat publike nuk ekzistojnë prova që implikojnë drejtpërdrejt Fatmir Zymberin në aktivitet kriminal, por mungesa totale e hetimit mbi një transaksion me vlerë të pritshme disa miliona euro, konteksti penal i pronësisë së mëparshme dhe mungesa e çdo reagimi nga organet ligjzbatuese krijojnë një interes të fortë publik për sqarim. /Pamfleti
