Zyra Kombëtare e Auditorit (ZKA), në raportin e fundit të auditrimit ka identifikuar se në konkursin për pozitën: Zyrtar i pasurisë, është punësuar një kandidat me përvojë pune në fushën e gastronomisë, ndonëse pozita kërkonte përvojë profesionale relevante prej së paku një viti, të dëshmuar përmes pagesave në fondin e kursimeve pensionale apo në Administratën Tatimore të Kosovës.
Dokumentet e pranuara dëshmonin përvojë pune, por jo në fushën e kërkuar.
“Për më tepër, është evidentuar se në dy raste të ndara, personat e emëruar si ushtrues detyre në pozita të caktuara kishin tejkaluar afatin maksimal ligjor prej 12 muajsh. Në një rast, pozita është mbajtur nga ushtrues detyre që nga 1 tetori 2010 deri në kohën e auditimit në mars 2025, çka përbën shkelje të qartë të Ligjit për zyrtarët publikë”, thuhet në raport.
Po ashtu në raport të auditorit është theksuar se anashkalimi i kritereve të konkursit nga komisioni rekrutues krijon mundësi për përzgjedhjen e stafit pa përgatitje dhe përvojë të duhur profesionale, duke rrezikuar seriozisht performancën dhe funksionimin e institucioneve.
Shkelje edhe në kompensimin e orëve jashtë orarit. Një tjetër gjetje lidhet me kompensimin e orëve jashtë orarit për pjesëtarët e FSK-së.
“Në fund të vitit 2024, ministria kishte filluar kompensimin financiar për punën jashtë orarit për periudhën janar-maj 2024, ndërkohë që për pjesën tjetër të vitit, për shkak të mungesës së buxhetit, ishte aplikuar kompensimi me ditë pushimi.
Ministria është në proces të ndryshimit të Rregullores Nr. 10/2019 për orarin e punës në FSK, por për shkak të mungesës së buxhetit dhe paqartësive në rregullimin e punës jashtë orarit, ky proces ende nuk është finalizuar “, thuhet në raport.
Mospërputhje dhe vonesa në prokurim, auditori ka gjetur shkelje në fushën e prokurimit.
Në tenderin për “Ndërtimin e objektit të rojës në Devë – Gjakovë dhe Suharekë”, është identifikuar se operatori ekonomik nuk kishte plotësuar kriterin për regjistrimin e mjeteve, pasi kamionët e ofruar kishin libreza të regjistrimit të skaduara që nga viti 2022.
Gjithashtu, janë evidentuar vonesa në përmbushjen e kontratave, përfshirë:
Furnizimi me çizme në vlerë mbi 629,000 euro, me vonesë prej 55 ditësh;
Furnizimi me kamionë, furnizimi me uniforma për kadetët vlera mbi 19,000 euro, furnizimi me emblema dhe grada ushtarake vlera mbi 29,000 euro.
Sipas auditorit, anashkalimi i kritereve të përcaktuara në dokumentet e tenderit dhe mungesa e veprimeve për zgjatjen e validitetit të ofertave rrezikojnë dështimin e proceseve të prokurimit dhe shkaktojnë vonesa në realizimin e projekteve kyç.
