Vazhdimi i dialogut ndërmjet Kosovës dhe Serbisë është i mbushur me sfida dhe joefikasitet në zbatimin e asaj që është rënë dakord.Dushan Janjiq, drejtor i Forumit për Marrëdhënie Etnike, pret që nga janari, pas zgjedhjeve në SHBA dhe me të dërguarin e ri evropian, duhet të përgatitet një paketë e metodologjisë së re për dialog. Thelbi i të cilit do të jetë efikasiteti.
Lidhur me këtë çështje, në një prononcim për GazetaBlic, u deklarua politologu Fidan Ukaj.Ai tha se i dërguari i ri evropian pas janarit 2025, duhet të vijë nga një vend që e njeh Kosovën dhe po ashtu sipas tij ta ketë besimin e Kosovës.
“Mendoj se me ardhjen e të dërguarit të ri evropian pas janarit 2025, kur t’i përfundojë mandati z.Lajqak e që mendoj se i dërguari i ri duhet të vijë nga një vend që e njeh Republikën e Kosovës, e po ashtu ta ketë besimin edhe të Republikës së Kosovës sepse z.Lajçak i ka munguar besimi nga ana e palës kosovare”, deklaroi ai.Tutje, ai tha se Lajçak nuk ka qenë i paanshëm, por siç thotë Ukaj, ai ka mbajtur anë dhe për këtë arsye ka humbur besimin e Kosovës.
“Ka tregu që veç i paanshëm nuk ka qenë, ka qenë i njëanshëm për këtë arsye e ka humbur besimin e Kosovës, mendoj që i dërguar i ardhshëm që do të vijë sigurisht duhet ta ndërrojë strategjinë e vazhdimit të procesit dialogues e po ashtu edhe të zbatimit të marrëveshjeve”, tha Ukaj.
Më tej, ai thotë se forma e deritanishme e ndjekur nga Lajçak tij ka qenë qasje e gabuar.
“Kjo forma e deritanishme e ndjekur nga ana e z.Lajçak në njërën anë me e inkuraju e po ashtu me toleru Serbinë edhe përkundër përpjekjeve të saja edhe me aneksu territor në Republikën e Kosovës dhe në anën tjetër me vendos kushte apo kritere për Republikën e Kosovës siç ishte formimi i asociacionit të komunave me shumicë serbe, mendoj që ka qenë një qasje e gabueshme”, u shpreh ai politologu.“Një strategji e re e ndërtuar prej të dërguarit të ardhshëm që do të njihet nga ana e BE-së e që do të ishte një politikë balancuese, me presion të balancuar po ashtu zbatim të balancuar të marrëveshjeve të arritura do të ishte çelësi i vazhdimit të zbatimit të marrëveshjeve të arritura deri tani”, deklaroi politologu Fidan Ukaj për Gazeta Blic.
Ndërsa, analisti politik, Gazmir Raci, thotë se nëse ka një strategji të re të qasjes ndërmjet dhe që duhet të jetë domosdoshmërish balancues, atëherë është shumë e nevojshme.“Nëse ka një strategji të re të qasjes ndërmjet dhe që duhet të jetë domosdoshmërish balancues atëherë është shumë e nevojshme për me shku drejt finalizimit të zbatimit të planit franko-gjerman dhe të aneksit të Ohrit, përndryshe nëse insistohet vetëm në kërkesat e njërës palë këtë rast kërkesën e Serbisë për themelimin e asociacionit mendoj që nuk është e nevojshme një strategji e tillë”, u shpreh ai për Gazeta Blic.
Raci thotë se nëse një strategji e tillë merr për bazë kërkesat e Kosovës, duhet të ketë sukses.“Por, nëse strategjia e tillë është balancuese, është qasje e re që merr për bazë edhe kërkesat e Kosovës, atëherë besoj që duhet me pas sukses”, përfundoi analisti politik, Gazmir Raci.
