Në një nga intervistat e tij të fundit, kryeministri në detyrë, Albin Kurti, i referohej kompanisë së Vuk Hamovicit si “e Shqipërisë”, duke sugjeruar se nuk kemi të bëjmë me Serbinë, por me Shqipërinë.
Kurti ka folur për skandalin e blerjes së energjisë nga kompania serbe EFT-ja, që udhëhiqet nga Vuk Hamoviqi, duke pretenduar se nuk ka asgjë të vërtetë aty:
“Nuk ka asgjë të vërtetë aty. Të gjitha janë dezinformata. Në të kaluarën është e vërtetë që EFT, një kompani serbe me pronar Vuk Hamoviqin, i ka shitur energji Kosovës atëherë kur ka qenë drejtor i KEK-ut, Njazi Thaçi. Sa jam unë kryeministër, nuk e vazhdon avazin e vjetër siç po thoni ju EFT-ja dhe Vuk Hamoviqi. Ne në Kosovë e kemi KEDS-in dhe KESCO-n. E kanë sqaruar gjerë e gjatë, ministrja Artane Rizvanolli dhe deputeti ynë Armend Muja se s’ka asgjë të bëj me të vërtetën aty. Kur e kanë parë që ato janë dezinformata, kanë filluar të thonë se e kanë bërë me një kompani nga Shqipëria NOA”.
“Unë fare nuk e di se kush është kjo kompani. Për këtë mund të kërkohet përgjigja duke bërë pyetje në Tiranë. Çfarë kam të bëj unë me atë kompani?. Nëse dikur i kanë fituar miliardat, ti po thua tash a i kanë fituar centat. Le ta shikojmë me ZRRE-në çka ka ndodhur. Ka mundësi që ka pasur transmetim të energjisë nga Serbia në Kosovë në një vend tjetër, por kjo nuk do të thotë që ne kemi blerë energji elektrike. EFT-ja nuk fiton fare në Kosovë. Për këtë garantoj. Vuk Hamoviqi nuk fiton në Kosovë. Shikoni konferencat e Artane Rizvanollit dhe Armend Mujës, të gjitha përgjigjet i keni aty. Nuk mund të keni pyetje që s’e gjeni përgjigjen aty”, tha ai në Kanal 10.
Një raport i KOSTT-it, si pjesë e hetimeve të nisura në energjetikë, jep dyshime të forta për manipulim të çmimit të energjisë elektrike nga importi për Kosovën. Ekspertët e KOSTT-it gjetën se gjatë vitit 2025, në ankandet e SEECAO, bashkëpunuan kompanitë “Noa Energy Trade” dhe kompania shtetërore serbe “Elektroprivreda Srbije”. Dyshohet se të dyja kompanitë manipuluan sistemin në SEECAO për të rritur kostot e bartjes së energjisë elektrike për Kosovën.
Kompanitë “Noa Energy Trade” dhe “Elektroprivreda Srbije”, gjatë vitit 2025, në dhjetëra raste kishin bashkëpunuar në ankandet për shitblerjen e linjave të transmisionit që kishin destinacion Kosovën.
Raporti i brendshëm i KOSTT-it, pjesë e hetimeve të nisura nga ZRRE, evidenton dyshime për manipulim të çmimit të energjisë elektrike nga importi për Kosovën. Ekspertët gjatë hetimeve të sjelljes së palëve tregtare në SEECAO (Podgoricë) gjetën se, me kapacitetet ndërkufitare në ankandet e vitit 2025, bashkëpunuan “Noa Energy Trade” dhe “Elektroprivreda Srbije”, duke manipuluar sistemin për të ngritur kostot e bartjes së energjisë.
Gjatë vitit 2024, kostot për bartje të energjisë elektrike për Kosovën shkuan deri në 800 euro për megavat/orë, një “anomali” që ndodhë vetëm kur ka bashkëpunime të dyshimta mes tregtarëve. Raporti mbulon periudhën janar-tetor 2025, gjatë së cilës pati kosto të pazakonta për kapacitetet ndërkufitare, ku bartja e energjisë kushtonte shumëfish më shumë se vetë çmimi i energjisë.
Si manipulua tregu?
SEECAO rregullon ankandet për kapacitetet ndërkufitare të transmisionit. Sipas raportit të KOSTT-it, gjatë ankandeve ditore, “Noa Energy Trade” dhe “Elektroprivreda Srbije” rritën kostot e bartjes së energjisë, shpesh shumëfish më të larta se çmimi i energjisë elektrike. Në të paktën 40 raste, ankandet për Kosovën u përqëndruan vetëm tek këto dy kompani.
Monopoli i NOA-s
Kompania “Noa Energy Trade” kishte monopolin për furnizimin e Kosovës me energji nga importi dhe sigurimin e linjave për KESCO-n. Linjat e blera në ankand vjetor riktheheshin për rishitje në ankand ditor, ku pjesëmarrës ishte vetëm “Elektroprivreda Srbije”.
Raporti i KOSTT-it evidenton raste kur çmimi i bartjes për Kosovën shkoi mbi 100 dhe mbi 200 euro për megavat/orë, duke sugjeruar bashkëpunim të dy kompanive për të rritur kostot.
Elektroprivreda Srbije (EPS)
EPS është kompani energjetike në pronësi të plotë të Qeverisë së Serbisë, themeluar në vitin 1991, me 19,595 punonjës dhe kapacitet të instaluar prej 7,326 MW. EPS operon me termocentrale me linjit, hidrocentrale dhe termocentrale të tjera, dhe prodhon 36.461 TWh energji elektrike në vit.
EPS ka bashkëpunim të ngushtë me EFT-në të Vuk Hamoviqit, e cila ka pasur gjatë vitit 2024 linjat interkonektive Shqipëri-Kosovë. Sipas ARBK-së, EPS është pronare edhe e operatorit “Elektrosever”, përgjegjës për faturimin e energjisë në komunat veriore të Kosovës.
