Kompania “Trepça” Sh.A. ka larguar nga puna tre persona, pasi Komisioni Disiplinor ka konstatuar shkelje të rënda të detyrave të punës, përfshirë mungesa të paarsyetuara dhe përfitim të meditjeve pa qenë prezentë në vendin e punës.
Sipas vendimeve të marra më 8 janar 2026, njëri nga punëtorët ka munguar mbi 28 ditë pune, me raste pa asnjë skenim hyrje-dalje, ndërsa meditjet i janë paguar. Dy punëtorët e tjerë janë konstatuar se kanë pasur mungesa të përsëritura dhe të paarsyetuara gjatë vitit 2025 dhe fillimit të vitit 2026, përfshirë edhe raste të dyshimta të braktisjes së vendit të punës.
Në njërin rast, Komisioni ka theksuar se punëtori ishte recidivist, pasi ndaj tij ishin shqiptuar edhe më herët masa disiplinore, përfshirë vërejtje, largim të përkohshëm nga puna dhe dënim me paragjobë.
Bazuar në Rregulloren për Përgjegjësinë Disiplinore dhe Materiale të Punëtorëve, Komisioni Disiplinor ka vendosur ndërprerjen e marrëdhënies së punës për të tre rastet.
