Më 10 qershor në Kosovë vetëm 46 persona ishin të infektuar me Covid-19.
Mirëpo, jo pak ditë më vonë vetëm pas një muaji, ky numër ka arritur në mbi 2 mijë raste aktive.
Vetëm në 24 orët e fundit shifra e të infektuarve me Covid-19 ka arritur në 763 persona, shkruan Front Online.
Lidhur, me rritjen e rasteve dhe ndryshimin eventual të masave, Front Online ka kërkuar përgjigje në Ministrinë e Shëndetësisë.
Nga kjo ministri kanë deklaruar se situata me Covid-19, po përcillet në baza ditore.
Gjithashtu u theksua se të gjitha trupat relevante janë në gatishmëri dhe reagim ndaj COVID-19 në konsultime të vazhdueshme.
Por nga ky dikaster nuk kanë përjashtuar mundësinë e vendosjes së masave të reja antiCOVID.
“Të gjithë trupat relevante në gatishmëri dhe reagim ndaj COVID-19 janë në konsultime të vazhdueshme. Ndryshimi eventual i masave do të dal nga rekomandimet e ekspertëve”, thuhet në përgjigjen e MSh-së, për Front Online.
Në këtë dikaster kanë treguar edhe njëherë se cilat masa janë në fuqi.
“Masat aktuale në fuqi, rekomandojnë bartjen e maskës në mjedise të mbyllura dhe krahas kësaj vaksinimin”, thuhet më tutje në përgjigje.
Ministria e Shëndetësisë u ka bërë thirrje qytetarëve që të vaksinohen, pasi që vetëm më këtë parandalohet përhapja e virusit.
“MSh u bën thirrje qytetarëve që të vaksinohen, sepse kjo është masa me efektive për parandalimin e përhapjes së sëmundjes, zhvillimit të formave të rënda të saj dhe vdekjeve”, kanë thënë nga MSh-ja për Front Online.
Ministri i Shëndetësisë, Rifat Latifi, javë më parë deklaroi se në rast se situata me Coid-19 vazhdon të përkeqësohet do të duhet të vendosen masat e reja antiCOVID.
