Presidenti i Shteteve të Bashkuara, Donald Trump, javën e kaluar bisedoi me homologun venezuelas, Nicolas Maduro, dhe diskutuan për një takim të mundshëm mes tyre në ShBA, raportoi të premten gazeta e njohur amerikane, “The New York Times”, duke cituar disa persona me njohuri rreth çështjes.
Sipas kësaj gazete, tani për tani nuk ka plane për një takim të tillë, i cili – nëse do të ndodhte – do të ishte kontakti i parë ndonjëherë mes një presidenti amerikan dhe udhëheqësit autoritar venezuelas, raporton agjencia e lajmeve “Reuters”.
Zbulimi i telefonatës vjen në kohën kur Trumpi po vazhdon që të përdorë retorikë luftëdashëse ndaj Venezuelës, ndërkohë duke e përmendur edhe mundësinë e diplomacisë. Presidenti amerikan në të kaluarën ka dhënë shenja se do të ishte i hapur për bisedime me Maduron, edhe pse raporti i gazetës “The New York Times” lë të kuptohet se një bisedë e tillë tashmë ka ndodhur.
Administrata e Trumpit e ka përshkruar Maduron si udhëheqës jolegjitim, i cili udhëheq një organizatë për trafikimin e drogës, e njohur si Cartel de los Soles. Karakasi e mohon këtë akuzë. Shumë ekspertë të pavarur thonë se, përderisa narko-korrupsioni në Qeverinë e Venezuelës është problem i madh, ka pak dëshmi për një grup të organizuar të zyrtarëve që do të mund të quheshin tradicionalisht kartel.
As Shtëpia e Bardhë, as Ministria e Komunikimit e Venezuelës, e cila merret me të gjitha kërkesat e gazetarëve ndaj Qeverisë, nuk iu përgjigjën kërkesave për koment.
Një grumbullim domethënës ushtarak në Detin e Karaibeve ka qenë duke u zhvilluar me muaj dhe Trumpi e ka autorizuar CIA-n për të kryer operacione të fshehta në Venezuelë.
Të dielën, agjencia “Reuters” raportoi se Shtetet e Bashkuara do të hyjnë në një fazë të re të operacioneve të ndërlidhura me Venezuelën, ku mund të përfshihet përdorimi i opsioneve të fshehta. Dy zyrtarë amerikanë i thanë kësaj agjencie se në mesin e opsioneve që ishin duke u shqyrtuar përfshihej përpjekja për ta rrëzuar Maduron nga pushteti.
