Kombet e Bashkuara thonë se burimet e tyre po raportojnë se shtatë fëmijë vriten ose plagosen çdo orë në luftën e Sudanit.
“Siç u frikësua dhe siç paralajmërohej, situata në Sudan është bërë fatale për një numër të frikshëm të madh fëmijësh,” u tha gazetarëve në Gjenevë James Elder, zëdhënës i agjencisë së OKB-së për fëmijë UNICEF.
Ai tha se agjencia kishte marrë raporte nga OKB se 190 fëmijë u vranë dhe 1,700 u plagosën vetëm në 11 ditët e para të konfliktit që filloi më 15 prill.
Elder vuri në dukje se ata numra ishin mbledhur nga institucionet shëndetësore në Hartum dhe rajonin e Darfurit.
Qindra njerëz janë vrarë dhe qindra mijëra janë larguar nga shtëpitë e tyre në Sudan që nga fillimi i betejave tre javë më parë midis forcave të shefit të ushtrisë Abdel Fattah al-Burhan dhe Forcave të Mbështetjes së Shpejtë (RSF) të ish zëvendësit të tij Mohamed Hamdan Daglo.
Palët kanë rënë dakord për një varg armëpushimesh të shkurtra, por asnjëra nuk është respektuar plotësisht dhe të premten sulmet ajrore dhe të shtënat me armë vazhduan të tronditin Khartoum-in për të 21-ën ditë radhazi.
Agjencia e OKB-së për refugjatët dënoi gjithashtu situatën e rëndë në Sudan, duke u kërkuar të gjitha vendeve që të përmbahen nga kthimi i shtetasve sudanezë në vend.
UNHCR ka thënë se po përgatitet për një dalje prej 860,000 njerëzve nga Sudani në vendet fqinje, me më shumë se 113,000 njerëz që janë larguar tashmë nga vendi.
